Shillong, Jymmang 08
U Myntri Rangbah ka Jylla, u Conrad K. Sangma ha ka Sngi Balang u la pynpaw ka jingsngewsih kthang bad pynrem jur halor ka jingkren kynthoh jong u heh nongïalam ka Congress, u Sam Pitroda.
U Pitroda ha ka jingkren bad kawei na ki lad pathai khubor u la batai shaphang ka India kum ka ri kaba ïar ha kaba ki briew na ka thaiñ Mihngi ki long kum kiba na China, kiba na Sepngi kum kiba na Arab, kiba na ka phang Shatei, ki kham lieh bad kito kiba na ka phang Shathie ki long kum kiba na Africa.
“Ka jingkren na u nongïalam ba rangbah ka Congress, u Sam Pitroda ka long kaba sngewsih bad ka la ktah shi kat dei ïa ki jingsngew jong ki nongshong shnong ka Thaiñ Shatei Lam Mihngi bad kumjuh ïa ki nongshong shnong na kiwei-kiwei ki bynta jong ka ri,” la ong u Sangma.
U la ong ba kum u nongshong shnong ka Thaiñ Shatei Lam Mihngi, ka thaiñ ka la sakhi bad mad ïa ki jingshem ha ki por ki snem ba la leit ïa kiba bun jait ki jingkynthoh pyrshah ïa ki nongshong shnong jong ka.
“Ngi khmih lynti ba ngi la jam shakhmat haba ïadei bad kine kiei-kiei baroh hynrei haba ngi ïohsngew ïa ki nongïalam ba rangbah ka Congress kiba kren ïa ki ktien kiba ñiew beiñ bad ki bym ïahap, ka ktah ïa ki jingsngew jong ki briew jong ngi,” u la ong.
U Myntri Rangbah u la ong ruh ba ka India ka dei ka ri kaba ïar bad ki nongrim jong ka, ki long katkum ka jingïapher jong ki nongshong shnong la ka long ha ka liang ka lariti, ktien ka thylliej, ka dur ka dar – kaba pynlong ïa ka India kumba ka long.
“Haba phi sdang ban ñiew beiñ bad kren ïa kum kitei ki jingkren, ka long pyrshah ïa ki nongrim jong ka India,” u la ong da kaba bynrap, “Kumta nga da sngewsih kthang bad ngi pynrem ïa kane ka jingkren jong u nongïalam ba rangbah ka Congress, u Sam Pitroda.”
U Sangma u la ong ruh ba katei ka jingkren ka la kham ktah shuh-shuh naba ka wan na u nongïalam ba rangbah ka Congress bad kumta kane kan ym long kaba tei ha ka ban pynbeit ne ban pynlong kawei ïa ka ri.
Haba kdew ba ka Congress ka la pynjngai ïalade na ka jingkren u Pitroda, u Myntri Rangbah u la ong ba lada dei ba katei ki jingkren ka wan na u nongïalam barit, ne dkhot, lehse ka seng kan ym pynjngai ïalade.
“Hynrei hangne ngi ïakren shaphang u nongïalam ba rangbah, u dkhot uba la trei bad u Myntri Rangbahduh barim ka ri, uba la don bynta bad ka Sorkar ha ki por ba la leit, bad kumta u briew ha katei ka kyrdan ban kren ha katei ka rukom ka ïaryngkat bad ka nongrim jong ka Congress kaba ka ïeng halor katto-katne ki mat,” u la ong.
Shuh shuh u la bynrap, “Ka jingjar-jar kan ïalam ïa ki briew ban ngeit ba kane ka dei ruh ka nongrim kaba ka Congress ka ïeng. Kumta kin hap ban leh eiei ban ïa kaba pynjngai ïalade na kane ka jingkren.”
