Shillong, Jymmang 09
U Myntri Rangbah u Conrad K Sangma bad u Myntri ka tnat pule puthi u Rakkam A Sangma ki la kren ïa u Chairman ka National Testing Agency (NTA) kaba pynlong ïa ka eksamin National Eligibility and Entrance Test (NEET) ha Meghalaya ïa kiba kwah ban leit pule doktor namar ka la don ka jingkulmar jingmut hapdeng ki samla namar ka jingdon ar jait ki jingkylli.
La ong ba ki samla pule doktor kiba thoh ïa ka eksamin NEET dang shen ha kane ka Jylla ki la kulmar jingmut namar ki don ar jait ki jingkylli kawei kaba thoh MNOP bad kawei pat kaba thoh QRST.
Kane ka jingpynkulmar kine ki jingkylli ka la pynlong ruh ïa ka Khasi Students’ Union (KSU) bad Jaiñtia Students’ Union (JSU) ban dawa ba dei ban pynlong biang ïa ka eksamin NEET ha Jylla.
Ki la ïakynduh ruh ïa u Myntri ka tnat pule ka Jylla u Rakkam A Sangma ban pynsngew ïa kane ka jingeh jong ki samla pule namar ki don palat 400 ngut kiba thoh ïa ka eksamin NEET ha Jowai ha West Jaiñtia Hills kiba mad ïa kane ka jingeh namar ka la nang mih ka jingartatien ïa ka rukom pynlong ïa kane ka eksamin na ka bynta kiba kwah ban leit pule doktor.
U Rakkam haba kren sha ki lad pathai khubor u la ong ba u la dep ban kren bad pynsngew ha u Chairman ka NTA bad u Myntri Rangbah ruh uba don ha Delhi u la kren ïa kane sha ki bor ba dei khmih.
U la ong ba wat la ka dei ka bynta jong ka tnat ka koit ka khiah ban shimkhia hynrei kum ka Sorkar la pynsngew ïa kane sha ka NTA bad ngeit skhem ba kin shimkhia.
Haba kylli la ka NTA kan pynlong biang ïa ka eksamin NEET ha Jylla, u Rakkam u la ong ba u Chairman ka NTA u la pan kaiphod na kito ki jaka thoh eksamin ha Jylla halor ka rukom pynlong ïa ka eksamin NEET bad na ka liang ka NTA kan sa rai kumno ban leh.
Shuh shuh kane ka jingjia ka la nang pynartatien shuh shuh ïa ki samla pule kiba dei ban sa ïa ka eksamin CUET (UG) ha Jylla namar ïa kane ka eksamin ruh yn pynlong da ka NTA.
U Rakkam u la ong ba ka Sorkar Jylla ruh ka sngewkhia lada jia kum kine bad na ka liang ka NTA ka la pyntip ba ïa ka eksamin CUET yn sa pynlong ha Shillong, Jowai bad Tura bad ka jingbuh ïa ki jaka thoh eksamin ka dei katkum ka jingdon ki samla pule kiba pynrung kyrteng.
U la ong ruh ba ka NTA kan pynlong ‘offline’ ïa ka eksamin CUET (UG).
