Shillong, Jymmang 09
Ka Federation of Khasi Jaiñtia and Garo People’s (FKJGP), ka Khasi Students’ Union (KSU) Upper Shillong Circle bad ka Synjuk ki Nongsynshar Shnong ka Upper Shillong ha ka Sngi Palei ki la ïeng ban pyrshah jur ïa ka jingthmu jong ka Sorkar ban ai ïa ka jaka sorkar kaba heh haduh 13,500 sq ft sha u bar jylla ban tei petrol pump ha ka thaiñ Upper Shillong.
Kane ka jingpyrshah ki seng bad nongsynshar shnong ka thaiñ Upper Shillong ka la long hadien ba ka sorkar ka la pyntip ba ka la ai jaka sha u trai ka petrol pump ha Anjalee ba un tei ïa ka petrol pump kaba thymmai ha ka jaka jong ka sorkar kaba don ha Upper Shillong.
Halor kane, ha ka Sngi Palei ki nongïalam ka FKJGP, KSU bad Nongsynshar Shnong ka thaiñ Upper Shillong ki la ïakynduh kyrkieh ban ïakren bad ïatai halor kane ka kam.
Haba kren sha ki lad pathai khubor hadien ba la dep ban ïakynduh lang, u President ka FKJGP Upper Shillong u Bah Kitboklang Nongphlang u la ong da kaba buh jingkylli, balei ka Sorkar ka hap ban ai jaka kyrpang sha u bar jylla ban tei petrol pump?.
“Ngim lah ban sngewthuh ba haba ka sorkar ka shim ïa ka jaka kaba heh tang 2000 ne 2500 sq ft, te balei pat ka hap ban ai ka jaka kaba heh haduh 13500 sq ft, kaba heh haduh 3 ne 4 shah,” la ong u Bah Kitboklang bad bynrap ba haba ka sorkar ka shim jaka pat na ki trai jylla, ka la shu siew tang ka bai jaka, katba ïa ka jaka shawei la hap ban wad hi.
Une u nongïalam ka FKJGP u la ong ba kum ki seng bad ki nongsynshar shnong ka thaiñ Upper Shillong, kim don satia ban pyrshah ïa kata ka jingshna ‘Flyover’ jong ka sorkar ne ka jingpynheh surok Four-Lane, hynrei ka jingpyrshah ka long beit halor ka jingai jaka sha u bar jylla ban tei petrol pump ha ka thaiñ Upper Shillong.
Shuh shuh u la ong ruh ba kane ka jingpyrshah kam dei kaba thymmai hynrei ha ki snem kiba la leit ruh, ki la mih shakhmat ban pyrshah ïa ka sorkar jylla ba kan ai jaka ïa ki shipai hynrei namar ka jingpyrshah ki seng bad ka Synjuk ki Nongsynshar Shnong, ka sorkar kam shym la ai jaka shuh.
Kumjuh ruh ha kaba ïadei bad ka jingthmu ai jaka ka sorkar ban tei petrol pump ruh, na ka liang ki seng bad ki nongïalam shnong ki la dep ban pyrshah naduh ka 3 tarik u Nailar 2023 hynrei ka sorkar kam shym la khot ïakren eiei ïa ka seng ne ïa ki nongïalam shnong hynrei kila ïaid shakhmat ban ai beit ïa ka jaka.
“Ngi maham jur ïa ka sorkar ba lada ka ai jaka kum kine ïa ki bar jylla ha ka jaka Sorkar, kan plie lad ïa kiwei pat ki bar jylla ba kin ïoh ïa ki jaka sorkar nangne shakhmat,” u la ong.
U Bah Kitboklang u la pyntip ruh ba ka Synjuk ki Nongsynshar Shnong ha u snem ba la dep ka la ai da ka dorkhas ha u Myntri Rangbah ka jylla u Conrad K Sangma ba pyrshah ban ai jaka ïa u bar jylla ha ka jaka sorkar kaba don ha Upper Shillong.
