Shillong, Jymmang 09
U Director General of Police (DGP) ka Jylla, Dr. Lajja Ram Bishnoi u la shah ujor da ka ejahar halor ka jingkynnoh ba u la pyndonkam da u ‘number plate’ thok ha ka kali ba ai pyndonkam ïa u.
Ïa kane ka ejahar la ujor da u Assistant Inspector General (AIG) barim ka tnat Meghalaya Police u Bah G.K Iangrai ha ka Sngi Palei bad uba dang don hapdeng ka jingshah sospon kaba la ujor ha thanat Shillong Sadar.
Kane ka jingshah ujor ejahar jong u DGP ba mynta u Dr. L.R Bishnoi ka la wan jia ruh 10 sngi shwa ka por ba un shongthait noh na kane ka kam, kata ha ka 19 tarik mynta u bnai.
Ha kane ka jingujor ba la ai, u Bah Iangrai u la kdew bad kynnoh halor ka jingpyndonkam bakla bad leh thok ïa u registration number jong ka kali, kaba la pyndonkam da u Dr. Lajja Ram Bishnoi, uba dei u DGP ka Meghalaya.
Lah ban pynkynmaw ba u Bah GK Iangrai u la shah kem ha ka 2 tarik Naiwieng, 2022, ha ka por ba u bat kum u Assistant Inspector General (Administrator) hadien ka jingtohkit halor ka jingkynnoh jong ka jingdon ka kam bamsap ha kaba ïadei bad ka thied kali na ka pisa ba la mang ban tei ïa ka National Emergency Response System (NERS) Building ha Shillong.
Ka jingtohkit ba hapoh (internal inquiry) ka la lap ba u Bah Iangrai u la donkti ban thied haduh 29 tylli ki kali kiba khlem pat pynrung kyrteng bad kiba la pyndonkam da ma u na ka bynta ki kam shimet.
Ha kane ka ejahar, u Bah Iangrai u la pyntip ba ha ka kaiphod ba thoh ha ka para 1 jong ka sla 3 jong ka Enquiry Committee kaba la thung ha ka 18 tarik Naitung, 2022, ka ong kumne, “Ba ka la don ka jingai da u number thok bad ka bym pat leh register ïa kawei ka kali Hyundai Verna kaba pynïeng ha Central Workshop, kaba la leh da u AIG-A, naba ym don satia ki kot ki sla”.
U la ong, ka paw ba ïa kane ka kaiphod la pynkhreh na ka jaka shong, kata kum ban shu ong ba la leh, khlem da leit tohkit ha jaka bad ban wad jingtip na ka kaiphod jong ka tnat Transport.
Katkum ka shithi hapoh ka Right to Information Act (RTI) kaba 27 tarik Naitung, 2023 halor kane ka kali kata ka Verna 1.6 VTVT ka dei kaba la pynrung kyrteng bad ka tnat Transport, ka Sorkar Meghalaya, Shillong kum ka nombor ML02-A-0001 ha ka kyrteng jong u Director General of Police, ka Sorkar Meghalaya.
Shuh shuh ha kane ka ejahar, u la ong ba katei ka jingtip ba la ai hapoh ka RTI da ka tnat Transport, ka sorkar Meghalaya, ka pynïap noh ïa ka kaiphod jong ka Inquiry Committee, kaba dawa ba dei ban leh eiei katkum ka aiñ pyrshah ïa ki dkhot ka committee.
Kawei pat ka bynta jong kane ka kam, ka long shisha kaba kham bang kaba lah ruh ban long ka sakhi, la ong u Bah Iangrai ha ka ejahar.
U la ong, ba u Lajja Ram Bishnoi uba bat ïa ka shuki Director General of Police, Meghalaya, u la wan sha Shillong ban shimti ïa ka kam ha ka 17 tarik Jymmang, 2022 da ka kali ronglieh ka Kia Carnival Limousine, kaba don ïa u registration number ka Sorkar Assam, hynrei hadien kane, la paw ba u Lajja Ram Bishnoi, lyngba ka buit kam bymman, u la pynkylla ïa u ‘number plate’ jong ka kali bad mynta u la buh da u number plate ba thymmai uba don ïa u Registration Number ML02-A-0001, kaba dei ka number ba la pynrung kyrteng ïa ka kali Verna 1.6 VTVT.
Kane ka ejahar na u Bah Iangrai ka la kynnoh ruh ba u LR Bishnoi ba u la pyndonkam ïa kane ka kali Kia Carnival Limousine rong rieh na ka bynta ki kam shimet ki jong u, wat la kane ka dei ka kali ba u shim wai (requisition) na ka bynta ka kam kaba tip bha tang da u LR Bishnoi, kumba ka la paw na ki dur ba u shon ha ryngkat bad kane ka kali.
Shuh shuh la ong ba ka jingpyndonkam ïa kane ka kali kum ka kali pulit, ka la dei lypa ka jingpynkheiñ ïa ki kyndon aiñ ki pulit; naba katkum ka Rules and Standard Guidelines, u DGP ka Jylla Meghalaya, u don hok ban ïoh ïa ka kali kaba shongdor hapoh ka 12 lak tyngka katba ka kali Kia Carnival Limousine ba thymmai ka shongdor haduh 40 lak tyngka.
U Bah Iangrai u la ong, baroh kine ki jingshisha ba la pynpaw hangne ki kdew beit thik ïa ka jingleh buit tuh bad leh thok da u LR Bishnoi. Halor kane, une u ophisar ba la shah sospon u la kyrpad ban pynrung mukotduma pyrshah ïa u DGP hapoh ki kyndon kiba ïahap bad ban tiañ bishar ïa u khnang ba un shah pynsaja halor kine ki kam ba u la leh.
