Mawkyrwat, Jymmang 09
Ka KSU Nobosohphoh Unit da ka mynsiem jong ka jingleh isynei bad ka jingkmen ha ka 9 tarik u Jymmang 2024 ka la ïoh ban aiti ïa ka ïing paki ba thymmai sha ka Kong Anjelina Sangriang kaba don ar ngut ki khun na ka shnong Rangbalang Umsaitshriew, South West Khasi Hills.
Kum ban shu kdew, kane ka longïing jong ka Kong Anjelina Sangriang ka dei kaba duk ba kyrduh haduh katta katta. Naduh ba u lok u la ieh ïa ki, ka Kong Anjelina ka la don ka jingduna ha ka bor pyrkhat bad kaba kham isynei shuh shuh ka long ba ka ïing ba ki shong ki sah ka la jot la pei bad bunsien ha ka por slap ki hap ban thiah jhieh.
Ka KSU Nobosohphoh unit hadien ba ka la lap ïa ki jingeh jingjynjar jong kane ka longïing ka la shim ka rai ba kan pynshna noh da ka ïing ba khambha ïa kane longkmie.
U samla Pynkmenlang Sanmiet, Education Secretary KSU Sengkmie haba ai jingkren nyngkong eh u la ai khublei ïa ka KSU Nobosohphoh Unit kaba la lah ban leh ïa kane ka kam radbah ïa kane ka longïing.
U la kyntu ïa ki dkhot kane ka shnat treikam ba kim dei ban kut tang ha ki kam leh isyeni hynrei ban peit ruh ïa ka pule puthi bad ban peit pyrman ïa ki jingsniew ha shnong ha thaw bad ban don ruh ka mynseim ïatreilang bad ki bor shnong, ki seng longkmie, seng samla bad kiwei kiwei na ka bynta ban pynbha ïa ka imlang sahlang.
Shuh shuh u samla Pynkmenlang u la pynshai ba ka KSU kam dei ka seng kaba lah ban ai skhim kum ka sorkar bad ka jingleh jong ki dkhot ïa kum kine ki jait jingleh isyeni ka dei namar ba ki don ïa ka mynsiem ïatip lem bad ka jingkitkhlieh ïa ka shnong ka thaw bad ka ri bad jaidbynriew.
Ha kane ka sngi ka seng, ka la ïoh ruh ban pynkup burom da ka khusnam Maitshaphrang award ïa ki san ngut ki khun samla kiba la pass bha ha ki eksamin bapher bapher, kaba long kum shi bynta ban pynshlur shuh ïa ki ban kin kiew shaphrang ha ki jingpule jong ki.
Kiwei kiba ai jingkren ha kane ka sngi ki long u Bah Commander Shangpliang, President ka Hills Farmers Union, samla Forwardman Nongrem, President KSU SWKHD, samla Rutherford Lyngdoh President KSU Mawkyrwat Circle lem bad ki sordar shnong, ki ‘riew rangbah jong ka shnong.
