Shillong, Jymmang 09
Ka Bharatiya Janata Party (BJP) Meghalaya ka la pynpaw ba ka kwah ïa ka Kong Idashisha Nongrang, ka ophisar IPS ba kan ïoh shong ha ka shuki kum ka Director General of Police (DGP) ka jylla namar ka long ka briew kaba tbit bad shemphang bha.
Kane ka jingkwah ka BJP ka la paw hadien ba ka UPSC ka la phah ïa lai tylli ki kyrteng ki ban shimti kum u/ka Director General of Police (DGP) ba thymmai ka Meghalaya. Kumta na ka liang ka BJP Meghalaya ka la rai ruh ban ïakynduh ïa u Myntri Rangbah ka Jylla u Conrad K Sangma ban ai jingmut ba un thung ïa ka Kong Idashisha Nongrang, IPS (RR-1992) ha kane ka shuki.
Haba kren sha ki lad pathai khubor, u Nongaiktien ka BJP Meghalaya u Bah Mariahom Kharkrang bad uba dei u ophisar IPS ba la shongthait u la ong, “Ka Kong Nongrang ka dei kaba biang eh ban shimti ïa kane ka shuki, nalor ba ka dei ka pulit ba la rangbah duh ha ka kam napdeng ki kyrteng ba la phah bad kaba don jingshemphang bha ruh ïa ka rukom treikam ka tnat Pulit ka Jylla”.
“Ngi shim ïa kane ka sienjam namar ngi ngeit skhem ba kane ka ophisar longkmie Khasi, kaba la kha bad heh bad san ha Meghalaya, kan ïalam ïa ka tnat Pulit naba kan sngewthuh khambha ïa ka jinglong-jingman hapoh ka Jylla, kaba long kongsan eh haba trei ïa ka kam kum ki pulit,” la ong u Bah Kharkrang.
