Shillong, Jymmang 09
Ka President jong ka Ri India, ka Droupadi Murmu ka la ai khusnam Padma Shri ïa ka Kong Silbi Passah ha ka thup saiñdur na Meghalaya ha ka Civil Investiture Ceremony kaba la long ha New Delhi ha ka Sngi Palei.
Katto-katne shaphang ka jingim bad ki kam jong Kong Silbi kaba pynlong ban ïoh ïa kane ka khusnam, i Kong Silbi Passah, i dei ba shong ba sah ha Riatsamthiah, Shillong, Meghalaya, bad i dei i nonghikai Hindi ba la shongthait, i dei i resource person jong ka Sarva Shiksha Abhiyan (SSA) bad DERT (Directorate of Educational Research & Training) bad i nongsaiñdur ba la pawnam.
I dei ruh ba la ai jingïarap ruh ïa ka SCERT, DERT, ha kaba ïadei bad ka jingai jinghikai ïa ki nonghikai ha ki kam saiñdur, kam Acting, kam Shad bad kam Rwai. Ka jingtbit jong i, ka long ha ka kam Socially Useful Productive Work (SUPW) bad ka put ka tem. I don ruh ïa ka Institute of Khasi Jaiñtia Folk songs and Traditional Musical Instruments.
La kha ïa i Kong Passah ha ka 3 tarik Lber, 1952 bad i la pyndep ïa ka Bachelor in Hindi (Kovid) bad shimti ïa ka kam nonghikai hindi ha ka Khasi Jaiñtia National Government Upper Primary School, Mawkhar Shillong ha u snem 1982. Ban kyntiew ïa ka ktien Hindi, i la ïashim bynta ha ka Radio Programme, “Hindi Lesson”, ba la pynmih da ka All India Radio Shillong. Ha u snem 2005, la phah ïa i sha ka Central Institute of Hindi (Agra) ban pynkhreh ïa ka Hindi-Khasi Contrastive Grammar.
I Kong Passah i dei iba kyntiew bha ïa ka put ka tem bad ka deiriti ha ka jylla. Lyngba ka tnat art and culture ha ka jingïatreilang bad ka (NEZCC) North East Zone Cultural Centre, i Kong Passah bad ka kynhun jong I, ki la ïoh shibun ki lad ban ïashim bynta ha ki tamasa bapher bapher ba la pynlong da ki zone bapher bapher ka ri kum ka South Zone Cultural Centre, South West Zone Cultural Central, West Zone bad kiwei kiwei.
Ka dei lyngba kine ki rynsan ba i la trei borbah ban pyni ïa ka deiriti jong ka Meghalaya. I dei i longkmie Khasi ba nyngkong ban pynmih ïa ka Hindi Skit kaba tip kyrteng kum ka “Hindi Bhasha Hamari Rashtra Bhasha Hai” kaba la pynmih ha ka Doordarshan Kendra Shillong. Dang shen, ka kynhun jong i ka la pyni ïa ka jingshad tynrai ha ka “Adi Shaurya Parv Parakram ka” 2023.
Kum ka jingithuh ïa ka jingtrei jong i Kong Passah bad ka jingtheh jingmut jong i ha ka kam, i la ïoh bun ki khusnam ha ki thup bapher bapher, kum ka khusnam District Certificate of Honour na ka Sorkar Jylla 2001, Seng Khasi, Seng Kmie Honorary Award (2008); State Award (2005); People’s Choice Award NETV (2005); National Award for Teachers (2006); Jeebon Roy Award (2008); Khasi Jaiñtia Welfare Award (2009); International Gold Star Award (Bangkok 2010); Seng Samla Seng Kmie Honorary Award (2011); Lady of Hope (Cape Town South Africa) (2012); U Tirot Sing Award for Art and Literature (Meghalaya 2014); Youth Affair Award (2019); 4th Northeast Unsung Heroes red carpet social award (2021) bad Sangeet Natak Academic Award (2021).
