Shillong, Jymmang 09
Ka jingdon kiba bteng ïa ka jingpule Science ka la nang hiar ha Jylla ha kaba wat kito kiba la pass ïa ka eksamin HSSLC (Science) ki phai noh ban pule da kiwei pat ki tnat pule.
Ka jingduna kiba bteng ïa ka jingpule Science kan nang pynduna shuh shuh ïa ka jingdon ki riewshemphang ha kane tnat pule.
La ïathuh ba bun ki samla pule kiba la pyndep ïa ka Class-XII (Science) ki la jied noh ban pule da kiwei pat ki tnat pule kum Engineering ne Arts kaba nang pynduna ïa kiba bteng ban pule BSc kaba dei shaphang ka Science.
Ha ka eksamin HSSLC (Science) mynta u snem 2024, kiba ïakhun ïa ka eksamin ki long 3,766 ngut bad kiba pass ki long 3,210 ngut ha kaba 1,295 ngut kiba pass ha ka kyrdan First Division bad 1,597 ngut ha ka kyrdan Second Division. Ka jingdon kiba pass baroh ka long 85.24%.
Na ka liang u Myntri ka tnat pule puthi u Rakkam A Sangma, u la ong ba ka Sorkar Jylla ha ka jingshisha ka la nang pynshlur naduh na skul ban shim ïa ka sobjek Science bad Mathematics namar lada ym ïoh jinghikai naduh tynrai ka eh bha ban don ka jingsngewtynnad ïa ki sobjek.
U la ong ba ka Sorkar ka la nang thaw lad ruh kumno ban sdang ïa ka jingpule Science ha ki kolej jong ka Sorkar bad ha u snem ban wan yn sdang ïa ka shnat pule Science ha Sohra bad Williamnagar Government College.
U Rakkam u kubur ba ki nonghikai Science bad Mathematics ruh ki duna bad kim da biang ha ki kyrdan pule kiba dang dei ha skul. Dei na kane ka daw ka Sorkar ka la pynlong ïa ka jingpynrung kam nonghikai shuh shuh ki ban hikai ïa kine ki sobjek ha ki skul khamtam ka sobjek Science bad Mathematics.
