Imphal, Jymmang 09
Ka sorkar Manipur ka la lap ba ki don haduh 5,457 ngut ki briew kiba la shu wan rung bad shong be-aiñ ha kawei ka distrik, bad na kine, ka sorkar ka la lum ïa ki jingtip na ki 5,173 ngut, la ong u Myntri Rang-bah, u N Biren Singh.
Haba thoh ha rynsan ‘X’, u Biren Singh u la ong ba la lap ïa kitei ki 5,457 ngut na Kamjong distrik, bad kane ka long haduh ka 7 tarik Jym-mang. Na kine, la lum ïa ki jingtip ba kongsan na ki 5,173 ngut. Ha kajuh ka por, u la ong ba ka jingpynphai ïa kitei ki nongwan rung bad nongwan sah be-aiñ ka la sdang ïaid “Ka jingpynphai ïa kitei ki briew ka la ïaid. Ngi la ai jingïarap ïa ki nongwan rung bad nongwan sah be-aiñ kiba ngi la lap haduh mynta. Wat la ka jinglong-jingman ka long bashyrkhei, hynrei ngi la pynthikna ba kan ym don kano-kano ka jingthut ne jingktah ha kane ka bynta,” la ong u Myntri Rangbah.
Ha ka 2 tarik Jymmang, u Biren Singh u la ïathuh ba ka bynta banyngkong jong ka jingpynphai ïa ki briew ba la wan rung be-aiñ na Myanmar ka la poi sha kaba kut ha kaba ki la don 38 ngut kiba la mih noh na Manipur lyngba ka Moreh kaba dei ka jaka ha khappud bad ka Myanmar.
Ha u bnai ba la dep, u Biren Singh u la kren halor ka jingmih jong ki 996 tylli ki shnong kiba thymmai kiba la shong la sah da ki briew kiba la shu wan rung be-aiñ, bad u la ong ba kane ka buh jingma ïa ki trai ri trai muluk bad ka jingshngaiñ jong ka Ri.
