Shillong, Jymmang 09
U MLA ka Mawryngkneng konstitwensi, u Bah Heavingstone Kharpran u la leit ai jingïarap ïa ki longïing ha shnong Mawlynrei kiba shah ktah namar ka jinglynshop ki bor ka mariang bad u la ong ba ki jingïarap kiba wan na ka Sorkar ym dei ban shim kabu bad kam burom.
U Bah Kharpran u la ong ba tang mar ïa ïoh jingtip lyngba ka phone na u Rangbah Shnong, ma u ruh u la phone ïa u DC ka East Khasi Hills district ban pynpoi ïa ki lad jingïarap bad ha kajuh ka por u la leit mih sha ki katno-katne ki longïing kiba shem lanot. U la ong ba na ka liang u DC ruh lyngba ka tnat Disaster Management u la leh ïa kaba donkam da kaba pynpoi ïa ki tin sop ïing ne CGI sheet sha ki longïing kiba shah ktah.
Haba pynpaw ka jingdiaw halor ka jingmih khubor kaba ong ba pynpoi jingïarap u MDC sha ki longïing kiba shah ktah katba u MLA u khlem leh eiei, u Bah Kharpran u la ong ba ïa ka jingïarap kaba wan na ka liang ki bor Sorkar, ym dei ban shim kabu bad shu kam burom.
Halor ka jingshah lynshop ki katto-katne tylli ki longïing ha ka ‘erïong ha Mawlynrei Khliehshnong, na ka liang u MLA ka thaiñ u la leit ai jingïarap ïa ki 6 tylli ki longïing kiba la shah ktah jur eh ha kaba la don ryngkat u Rangbah Shnong, Rangbah Dong lem ki dkhot ka VPP Mawlynrei unit bad kiwei kiwei.
U Bah Kharpran u la ong ba ïa kane ka jingïarap u la ai hi na ka tulop jong u namar ba ym shym la don kano-kano ka jingïarap kyrkieh kaba kyrpang lane ‘Special Emergency Fund’ haba jia kum kine ki jingjia. Kumta u la kyntu ïa ki bor Sorkar ban mang noh da ka Special Emergency Fund ïa ki MLA khamtam lada jia kum kine ki jingjia khnang ban ïoh pynpoi ïa ki lad jingïarap sha ki longïing kiba shah lynshop bad shem lanot.
U MLA u la pynpaw ka jingsngewnguh ïa ka Dorbar Shnong kaba la shim khia ban pyntip mar-mar sha u kum u MLA haba ïadei bad ka jingjia bad u la ai khublei ruh ïa u DC ka East Khasi Hills lyngba ka Disaster Management Department ba u la shim khia ban pynpoi ïa ki jingïarap kum ki tin sop ïing na ka bynta ki longïing kiba shah ktah.
