Shillong, Jymmang 10
Ka Sorkar MDA-2 ka la pynkhreh mynta ha ryngkat ka National Highway Infrastructure Development Corporation Limited (NHIDCL) ban pynurlong ïa kawei ka projek shna surok kaba heh ha kane ka Jylla ka ban ngiam ban ïaid saw tylli ki kali lane ‘four-lane’ bad kane ka surok kan sdang na Umïam shaduh Malidor ha khappud ka Meghalaya bad Assam.
Ban pynïaid ïa kane ka kam shakhmat na ka bynta kane ka projek, u Symbud Myntri Rangbah ka Jylla u Bah Prestone Tynsong uba peit ruh ïa ka tnat shna surok, u la lum ïa ka jingïalang bad ki tnat treikam bapher bapher lem bad u Chief Secretary, ki Deputy Commissioner jong ki saw tylli ki district ha ryngkat ka jingdonlang ki ophisar ka NHIDCL ha Secretariat ha ka Sngi Thohdieng.
Kane ka surok kaba ngiam saw tylli ki kali kan sdang naduh Umïam na ka bynta ba don ka fly over bad kan ïaid lyngba ka Shillong Bypass ter ter sha Jowai ha West Jaiñtia Hills district bad shaduh Malidor ha East Jaiñtia Hills district kaba don ruh ha khappud ka Meghalaya bad Assam.
Ka jingjrong kane ka surok four-lane la antad hapdeng 150km bad 160km na Umïam sha Malidor.
Haba kren sha ki lad pathai khubor hadien ba la wai ka jingïalang, u Bah Prestone u la ong ba ha ka jingïalang la dep ban ïakren sani na ka bynta kane ka projek khamtam ka jingshim jaka kaba donkam ban pyndep lyngba ki DC.
U la ong ba ki DC kin don la ki jong ki Committee ha ki district da kaba kynthup ïa ki ophisar jong kawei-kawei ka tnat treikam ka Sorkar ha ryngkat ka NHIDCL.
Kumba ka long mynta, ka East Khasi Hills bad Ri Bhoi district ki la don lypa ka Committee bad la bthah ruh ïa ki DC jong ka West Jaiñtia Hills bad ka East Jaiñtia Hills district ba kin thaw ïa la ki jong ki Committee na ka bynta kane ka project kaba donkam eh ïa ka jylla.
U Bah Prestone u la ong ba namar kane ka dei ka projek kaba heh ha ka jylla bad ka jingshna ïa ka surok kan poi shaduh ki bynta jong ka Silchar ha Assam Barak Valley, kumta ka jingmang pisa la antad ba kan kot sha ka 20 hajar klur ne 22 hajar klur tyngka.
U Bah Prestone u ïathuh ba ka kam ka la sdang ban ïaid shakhmat bad hap pyndep shwa ïa ki jingthew kiba bniah namar kane ka projek ha Meghalaya ka don kumba 5 tylli ki song (Package) bad ka la don ruh ka jingtyrwa ban shna ïa ki surok kiba ngam shapoh (tunnel) ha kane ka projek kaba la mang da ka sorkar bad ynda la dep lut baroh ki jingpynbiang yn ïaid sa ka jingshim jaka.
