Shillong, Jymmang 10 (UNI)
U nongrah ktien ka France sha India, u Thierry Mathou ha ka sien jngoh banyngkong sha ka Jylla, ha ka Sngi Thohdieng u la leit jngoh ïa ka ‘law kyntang, mawbynna bad ka ‘Heritage Village’ ha Mawphlang.
U Mathou u la ïaid palat 3 km bad leit jngoh ïa ka ‘law kyntang ha Mawphlang, ha kaba la lam lynti ïa u da u khlieh ka Kur Lyngdoh ka Hima Mawphlang, Bah Tambor Lyngdoh Mawphlang.
“U nongrah ktien u long uba kloi ban sngap bad shah shkor ïa ki jingbatai shaphang ki jingthung kiba don ha kane ka ‘law kyntang. U khlieh nongïalam ka Kur u la batai ba ïa ka khlaw (‘law kyntang) la kyrkhu da ki Blei kiba long ki nongri nongker kiba ïada ïa ki khlaw, kumta ym shah ban leh ïa kino-kino ki kam sniew. Ki ‘law kyntang ki kynthup ruh ïa ki jaka lehniam ha kaba ki Syiem Khasi mynshuwa ki ju ïashim bynta bad kane ka bteng haduh mynta khamtam ha ki sngi kyrpang. Ki ‘law kyntang ki la khring ruh ïa ki nongjngoh kai pyrthei bad ki stad wad bniah kumjuh, kiba wan ban sngewthuh bad pule ïa ka basa jingim ba kyrpang,” la ong u ophisar.
“Nga long uba donbok ban leit jngoh ïa ki ‘law kyntang. Ngi hap ban ïoh jinghikai na phi, halor kumno ban ïada ïa ka mariang bad ki jingdon-jingem jong ka. Kane ka jingwan jngoh banyngkong ka long ban sngewthuh kham bha ïa ka Jylla bad sakhi ïa ki jingdonkam jong phi bad ha kane ka rukom ngin ïakren,” la ong u nongrah ktien.
Ïa ka ‘law kyntang ha Mawphlang la burom bad ïada da ki Khasi da ki spah snem mynta.
