Shillong, Jymmang 10
U Symbud Myntri Rangbah ka Jylla, Bah Prestone Tynsong, u la ong ba ka jingujor pyrshah ïa u DGP ka jylla halor ka jingkynnoh ba u pyndonkam ïa ka kali da u nombar thok la pynrung ha ka mukotduma bad ka jingtohkit ka dang ïaid bad ki bor jong ka aiñ kan leh ïa kaba donkam.
U DGP ka Jylla u Dr. Lajja Ram Bishnoi un sa shongthait hapoh 10 sngi bad ïa kane ka ejahar la ujor da u AIG (A) ka tnat Pulit u Bah Gabriel K Ïangrai uba dang shah sospon namar u la ngat ha ka jingshah kynnoh ba u pyndonkam bakla ïa ka pisa kaba la mang na ka bynta ban tei ïa ka National Emergency Response System (NERS) Building ha Shillong bad kiwei-kiwei ki jingkynnoh ha kaba u la shahkem ruh ha ka 2 tarik u Naiwieng, 2022.
U Symbud Myntri Rangbah u la ong ba haba don kiba ujor ejahar, ka tnat pulit ka hap ban pdiang ban pynlong ka jingtohkit. U Bah Prestone u la ong ba ïa mynta, ym pat lah ban ong eiei namar ïa ki jingtip kiba bniah yn tip hadien ka jingtohkit bad yn sa phah sha ka Ïingbishar ban pynthikna la ka long kaba dei ne ka bym dei.
Halor ka jingujor pyrshah ïa ki dkhot ka Enquiry Committee halor ka jingthied kali ka tnat pulit, u Symbud Myntri Rangbah u la ong ba u briew uba ujor ïa ka ejahar u la phai biang shadien ïa ka mat kaba ka Ïingbishar mynta ka dang hap ban rai. Kumta u la ong ba ym pat lah ban ong eiei ruh halor kane.
