Shillong, Jymmang 10
U Symbud Myntri Rangbah ka Jylla u Bah Prestone Tynsong u la ong ba ka Sorkar Jylla ka la dep rai ïano napdeng ki IPS ophisar ban thung ha ka kyrdan Director General of Police (DGP) tangba ka dang ap ïa ka jingbit na ka Election Commission of India (ECI) ban pynbna namar ka kyndon pyrkhing ilekshon lane Model Code of Conduct (MCC) ka dang treikam namarba mynta dang don hapdeng ki wat jong ka ilekshon Lok Sabha kiba dang pynlong ïa ka jingthep ‘vote’ ha kiwei pat ki jylla.
U Bah Prestone u la ïathuh ha ka Sngi Thohdieng ba ka Sorkar ka la dep phah sha ka Election Commission of India (ECI) ïa ka jingtyrwa ha kine ki sngi bad mynta dang ap ïa ka jingbit jong ka ban pynbna. U la ong ba tang shu ïoh jingbit ban ïaid shakhmat, ka Sorkar kan sa pynbna ha kano-kano ka por ïano ka thung ha ka kyrdan DGP napdeng ki IPS ophisar kiba la don kyrteng ha ka thup ban poi sha katei ka kyrdan.
Haba kylli halor ka jingdon kiba pynsngew ba dei ban thung ïa ka Kong Idashisha Nongrang kum ka DGP bathymmai ka Jylla, u Bah Tynsong uba peit ïa ka tnat pulit u la ong ba ym donkam ïano-ïano ban ong ïa ka Sorkar ïano dei ban thung DGP namar ka Sorkar ka la tip ïano ban thung bad ïa kane ieh ha ka rai jong ka Sorkar bad ym dei ban don ka jingartatien namar ka Sorkar kan thung ïa kiba biang tam.
Ka Sorkar Jylla ka dang ap ïa ka jingbit jong ka ECI hadien ba ka Union Public Service Commission (UPSC) ka la phah ïa ka kyrteng jong ki lai ngut ki ophisar Indian Police Service (IPS) ha kaba iwei na ki yn thung ha ka kyrdan DGP. Ki lai ngut ki ophisar IPS kiba ka UPSC ka la phah ïa ka kyrteng jong ki ban shah thung ha ka kyrdan DGP ki long ka Kong Idashisha Nongrang (jong u snem 1992), R P Meena (jong u snem 1993) bad Deepak Kumar (jong u snem 1994). Ka Sorkar lyngba ka tnat pulit ka la pynmih ïa ka jingpynbna ha ka Sngi Ba-ar kaba ïathuh ba u DGP ba mynta u Dr. L.R Bishnoi ynda la dap 2 snem ka jingshakri kum u DGP un shongthait ha ka 19 tarik mynta u Jymmang, 2024.
Ka Kong Nongrang kaba la kham shwa kum ka ophisar IPS, ka lah ban shah thung kum ka DGP bathymmai ka Jylla bad lada ka shah thung, kan dei ruh ka ophisar IPS kynthei kaba nyngkong eh na kane ka Jylla ban poi sha kane ka kyrdan.
Ka Kong Nongrang mynta ka bat ïa ka kyrdan Director General (Civil Defence & Home Guards) ka Jylla.
Dang shen, ka Sorkar Jylla ka la phah ïa ka kyrteng jong ki 5 ngut ki ophisar IPS sha ka UPSC ban jied ïa ki ban shah thung ha ka kyrdan DGP.
Kine ki 5 ngut ki long ka Kong Idashisha Nongrang, R P Meena, Deepak Kumar, GP Singh (1991 batch) bad Harmeet Singh (1992 batch). Hynrei kine ki ar ngut G P Singh bad Harmeet Singh kim treh ban shimti ïa kane ka kyrdan. Kumta ka UPSC ka la phah ïa ka kyrteng tang jong kitei ki lai ngut.
