Shillong, Jymmang 10
Ka State Disaster Management Authority (SDMA) ka la lum ïa ki Deputy Commissioner jong ki district bapher bapher ban pynkhreh bad shim lypa ki sienjam namar ka jinglynshop ki bor ka mariang ha Jylla naduh ka jinghap slap khlem sangeh, ka lyer bad ki jingtwa kiba lah ban jia bad ktah ïa ki nongshong shnong.
Ïa kane ka jingïalang la pynïaid da u Commissioner & Secretary ka tnat Disaster Management u Sanjay Goyal ha ka jingdonlang ki ophisar ka SDMA, ki Deputy Commissioner, Civil Defence & Home Guards bad kiwei kiwei ki tnat treikam.
Haba kren sha ki lad pathai khubor hadien ka jingïalang, u Goyal u la ong ba kane ka jingïalang ka dei jong ka State Level Coordination Committee kaba long kum shi bynta ban pynkhreh lypa ïa ki jingshah lynshop namar ka jingjur slap, jingtwa, ‘erïong bad kiwei kiwei ki jinglynshop ka mariang bad kumno ban pynkhreh ïa ki lad ki lynti ban ïada bad ïarap ïa kiba shah ktah.
U Goyal u la ïathuh ba ka bynta kaba kongsan kaba la ïakren ka long kumno ban pynkhreh ïa ki jingïarap kiba kyrkieh lada jia ba wan lynshop ki bor jong ka mariang ha kaba la aiti ha ki DC bapher bapher jong ki District ban thaw ïa ki District Level Coordination Committee ban thaw ki lad jingïarap sha ki lanot kiba shah lynshop ha ka mariang.
U Goyal u la pyntip ruh ba na ka liang ka Sorkar Jylla ka la pynkhreh ïa ki kor ki bor ban ïoh jingtip ki ban long ki lad ban pynkloi ïa ki jingïarap sha kito kiba shah ktah kum ka jingpyntreikam ïa ki Control Room ha man la ki district ki ban lum jingtip lada don ki jingjia kiba ïadei bad ki briew kiba shah ktah.
U Goyal u la ïathuh ruh ba ka Sorkar ka la dep ban mang lypa kumba 20 klur na ka bynta baroh ki district lyngba ki DC khnang ba kin ïoh ban phah ki jingïarap sha ki briew kiba donkam jingïarap lada shah ktah namar ka jinglynshop ki bor ka mariang.
Ïa kane ka pisa la phah sha ka State Disaster Relief Fund (SDRF) bad ka jingpang ïa ka pisa ka long katkum ka jinglong-jingman khamtam katkum ka jingshah ktah.
U la ong ba ki jingïarap ïa kiba la shah ktah ha ka lyer bad u slap ha kine ki sngi na ka liang ka sorkar ka la ïaid shakhmat ban pynpoi ki lad jingïarap sha ki briew hapoh 24 ne 48 kynta.
U la ong ba mynshwa ka don ka jingeh ban pyllait ïa ki jingïarap sha kito kiba donkam jingïarap kyrkieh hynrei mynta kane ka la don namar ba u Myntri Rangbah u Conrad K Sangma ruh dalade u la shim khia ïa kane khamtam ban pynsted ki lad jingïarap na ka bynta kito kiba shah ktah bad shem lanot.
U la ong ha ki jaka ba long lum, la mang ban ai 1.30 lak tyngka lada shah pynjulor lut ka ïing baroh kawei bad ha ki jaka ba long madan, ka jingïarap ka long 1.20 lak tyngka.
U Goyal u la ïathuh ba tang ha kine ki 45 sngi ba don ka jinglynshop ka mariang kum ka jingjur slap, hap phria, jingjur ka lyer bad kiwei kiwei, ki la don haduh kumba 2,800 tylli ki longïing kiba shah ktah bad ki don ruh 5 ngut kiba khlad na kine ki jingjia shah lynshop ha ki bor ka mariang.
Halor ki jingshlei um kiba ju jia namar ka jingleh hi ki briew, u Goyal u la ong ba la bthah ïa ki bor ba dei khmih ban peit ruh ïa ki jaka kiba ju jia ka jingshlei um haba jur u slap bad la bthah ruh ba baroh ki surok khamtam ha Sor ki dei ban don ki nala khnang ba ka um kan ïoh tuid laitluid ym ban lang bad shlei ha surok bad ki jaka ba sah briew.
