Shillong, Jymmang 10
Hadien ba ki dkhot ka HYC Sengkmie ki la ïoh bat ïa 22 ngut ki nongdih bad nongkhaïi drok na ka thaiñ Khyndai-Lad ha ka janmiet Sngi Thohdieng, uwei u khynnah samla uba kam ïalade ba u dei u ‘Dalal’ ne uba pynïaid ïa ki kam pynïoh drok u la ong ba ïa ka kam pynïadei ban ïoh drok u la leh la kumba lai taïew mynta bad nalor jong u, dang don sa 7 ngut kiwei pat kiba leh ïa kane kajuh ka kam.
Haba pyrshang ban kylli mano ba ïalam ne hikai ïa u ban dih drok, une u khynnah u la phla ba ym shym la don mano-mano ba hikai ïa u hynrei u leit ban ïeng ha Khyndai-Lad bad na ka jingïakynduh paralok bad hadien ba ïohi ba ki ïoh pisa ma u ruh u la leh lang ïa katei kajuh ka kam.
U la ïathuh ruh ba u ju ïoh T.100 na uwei u briew uba kwah drok bad ïa kane la ai da ki kynthei kiba ïatreilang, bad kine ki don naduh 2 baje noh phai sngi haduh 6 baje mynmiet.
“Nga ju wan hangne ha PB bad nga shu pynkren kumto,” u la ong.
Haba kylli naduh mynno u la leh ïa katei ka kam, u la ïathuh ba u la sdang ïa kane ka kam mynta la lai taïew.
“Ym don ba ïalam, nga wan ban ïeng kai bad nga ïakynduh paralok. Ki kynthei ki ju ong pynkren lem ïa ki shynrang, nga pynkren bad kin sa wan ki kynthei,” u la ong.
U la ïathuh ruh ba don sa 7 ngut kiwei pat ki ‘Dalal’ nalor jong u.
Haba kylli, u la ong, “Nga ïeng kai ha PB bad nga ïakynduh paralok. Nga ïohi ba ki kren kito bad ki ïoh pisa. Nga ruh nga leh lang bad nga ïoh `100 na uwei u briew. Ïa kane ka pisa ki ai ki kynthei.”
