Shillong, Jymmang 10
Ka NEHUTA ha ka Sngi Thohdieng ka la dawa hiar shuki ïa ki Dean kiba khlieh ïa katto-katne ki tnad pule ka NEHU naba ka rukom thung ïa ki kam long katkum ka aiñ.
“Ka jingïalang ba kyrkieh jong ka ‘General Body’ kaba la long ha ka Sngi Thohdieng, ka la ïamir jingmut bin-pa-bin halor ka mat ba ïadei bad ka jingthung kam ka bym ïaid beit bad ka bym long katkum ka aiñ ïa ki Dean ha ka School of Social Sciences bad ha ka School of Economics, Management and Information Sciences (SEMIS),” ong ki nongïalam ka NEHUTA ha ka kyrwoh khubor.
Ka NEHUTA, hadien ba ka la shim khia ïa ka nongrim katkum ka aiñ – da ka pali katkum ka jingrangbah ha ka kam, na bynta ban thung ïa kino-kino ki ophisar ha kano-kano ka skulbah ka Sorkar Pdeng (kynthup ka NEHU), ka la rai ban phah hiar shuki mardor ïa ki Dean (kiba don hapdeng ka kam) naba ka rukom thung ïa ki, ka pynkheiñ ïa ka jingbym shah liang, ka hok bad ki nongrim kiba la khmih lynti ba kum ki nonghikai ki dei ban pynneh.
“Kumba ka long, ka UGC Regulations, 2018 ka bthah ban pynneh ïa ki kyrdan ka pule-puthi ba paka bad nongrim ban pynneh ïa ki kyrdan jong ka pule-puthi ha ka skulbah ba hakhmat ka Sorkar Pdeng kum ka NEHU,” la ong ka NEHUTA.
Ki nongïalam ki la ong ruh ba ka jingïalang ka la rai ban thoh sha u Vice-Chancellor (VC) kumjuh ban phah kopi sha u Chancellor, Chief Rector, Visitor bad sha kiwei-kiwei ki bor ba dei khmih da kaba kdew kumno ki ïingbishar ‘High Court’ ha kylleng ka ri ki la pynsngew biang ïa ka nongrim katkum ka aiñ – da ka pali katkum ka jingrangbah ha ka kam ,khnang ba u VC ka NEHU u lah ban pynbeit ïa ka jingbakla kaba lah ban ïalam sha ka jingleh pyrshah ïa ka hukum ka ïingbishar, ha kawei ka liang kaba pynsiewdur pat ïa ka kolshor ka pule-puthi bad rukom pynïaid ïa ka NEHU.
Shuh shuh, ka NEHUTA ka la sakhi ïa ka jingpynshitom na ka liang ka skulbah pyrshah ïa u Jose Cherian, Executive Engineer, uba la don hapdeng ka jingshah sospon ha ka 8 tarik u Jymmang, 2024 namar ka jingleh bakla bad jingkynnoh bamsap pyrshah ïa u.
Kum ban shu kdew hangne, utei u Karikor u la shah kynnoh donkti ha ka CBI kumjuh ha ka jingtohkit ba la pynlong da ka skulbah.
“Ka seng kan ïai buddien halor kane ka kam naba ka skulbah ka la pynslem ban leh eiei halor kane. Kane NEHUTA ka sngewkhia shi kat dei halor kane ka jingpynslem naba ka ai lad ïa u Cherian ban tuklar ïa ki kot ki sla. Ka seng kan ïeng pyrshah barabor ïa ka bamsap bad kan ïai kynjoh ïa ka thong ban pynkhuid ïa ka rukom treikam hapoh ka skulbah,” la ong ki nongïalam ka NEHUTA ha ka kyrwoh.
