Shillong, Jymmang 10
U dkhot ka Syngkhong Rympei Thymmai (SRT), Bah K. Pahsyntiew, u la ong ka seng kan leit sha ïingbishar ban ïoh ïa ka jingbishar kaba hok hadien ba ka tnat Social Welfare jong ka sorkar jylla ka la rai ban pynduh Scheduled Tribe (ST) ïa ki Khasi kiba ai jait kpa.
Une u dkhot jong ka SRT uba ai jait sha u kpa, u la ong ba lada ka tnat Social Welfare ka pynduh Scheduled Tribe ïa kiba ai jait sha u kpa kan leh kumno pat ïa kito ki Khasi kiba ai lang ka jait sha u kpa bad ka kmie.
U la ong ruh lada pynduh Scheduled Tribe ïa ki Khasi kiba ai jait kpa kin leh kumno ïa kito ki Khasi kiba ïoh kpa da kiwei ki jaidbynriew.
Nalor nangta, u la ong ka KHADC bad ka Sorkar Jylla kim lah ban pynduh Scheduled Tribe ïa ki Khasi kiba ai jait sha u kpa, hynrei dei tang ka Sorkar India kaba lah ban shim rai namar ka aiñ kaba thaw da ka District Council ka ïap noh lada thaw ka Sorkar Jylla bad ka aiñ ba thaw ka Sorkar Jylla ka ïap noh lada thaw da ka Sorkar India.
“Haduh mynta ngim pat tip la kane ka jingpynbna pynduh ST ïa kiba ai jait kpa kan urlong ne em namar ngim pat ïoh ïa ka shithi ha kti hynrei ban ïada ïa ki khun kiba ai jait kpa ngin leit beit sha ïingbishar” u la ong.
Shuh shuh u Bah Pahsyntiew u la ong ba ki don bun ki MLA ki MDC kiba ki kpa jong ki kim dei ki Khasi bad ki don bun ruh ki MLA bad MDC kaba ki ai jait lang sha ka kmie bad sha u kpa ruh.
Kum ban shu pynkynmaw, ka jingpynduh ST ka tnat Social Welfare ïa ki Khasi kiba ai jait kpa ka dei hadien ba u CEM barim ka KHADC u Bah Titosstarwell Chyne u la phah jingthoh ban nym ithuh ST ïa kiba ai jait kpa hynrei dei ban ithuh tang ïa kiba ai jait sha ka kmie kaba dei katkum ka riti dustur.
