Shillong, Jymmang 10
U heh pulit MPS, u Bah Gabriel K Ïangrai, ha ka Sngi Thohdieng u la thoh sha u Superintendent of Police (SP) ka East Khasi Hills, u Rituraj Ravi, ban kyntu ïa u ban shim ïa ki sienjam ban pynneh-pynsah ïa ki dur ki dar ba la ring na ki kor CCTV ha thanat Sadar, thanat CID bad Police Headquarters (PHQ).
Ha ka shithi, u Bah Ïangrai u la ong ba ha ka 9 tarik Jymmang, 2024, u la leit ban ai da ka ejahar ha thanat Sadar.
Une u heh pulit MPS u la ai da ka ejahar ha thanat Sadar pyrshah ïa u khlieh duh ka tnat pulit (DGP), u Dr. L.R Bishnoi, halor ka jingkynnoh ba u la pyndonkam da ka nombor (Number Plate) thok ha ka kali ba ai pyndonkam ïa u.
“Na ka bynta ka jingbishar ba hok bad ka jingkohnguh ïa ka aiñ, nga kyrpad ba ïa ki dur ba la ring da ki kor CCTV ha katei ka jaka (thanat Sadar) naduh ki ar snem ba la leit noh, dei ban shimti bad ban pynneh-pynsah ïa ki khnang ba ka jingtohkit kan long kaba ïaid beit bad nalorkata, ka lah ban don ka jingpyrshang ban pyndam ïa ki dur (ba la ring da ki CCTV) namar ka jingujor ka dei pyrshah ïa u khlieh duh ka tnat pulit,” la ong u Bah Ïangrai.
Ha kajuh ka por u la ong ba ka thanat CID, katkum ka jingtip jong u, ka la pyndait ïa ki kor CCTV kaba long katkum ka jingbthah ka Supreme Court na ka por sha ka por. Utei u heh MPS u la ong ruh ba ki don ki kor CCTV ba la pyndait na ki bynta ba shadien bad shakhmat jong ka Police Headquarters (PHQ).
U la ong ba kitei ki CCTV ba don ha PHQ kin ïoh beit ban ring ïa ka kali ba la pyndonkam da u Bishnoi ha ka por ba ka rung bad mih na PHQ.
