Shillong, Jymmang 10
Ka Hynñiewtrep Youths’ Council (HYC), Seng-kmie ha ka janmiet Sngi Thohdieng ka la ïoh bat ïa 22 ngut ki briew kiba donkti ha ka ban dih bad khaïi drok be-aiñ ha ki jaka paidbah jong ka thaiñ Khyndai-Lad.
Kitei ki 22 ngut (bun ki bar jylla) ki kynthup ïa 18 ngut ki shynrang bad 4 ngut ki kynthei bad ka seng ka la lum lang ïa ki ha jaka pynïeng kali jong ka MUDA Complex, ha Khyndai-Lad.
“Kane ka dei ka sien ba lai kaba ngi leit ban khynra ha kylleng ka nongbah ïa ka jingdih bad jingdie drok pathar ha ki jaka paidbah,” la ong u Vice-President ka HYC, Sengkmie, Bah Donboklang Kharlyngdoh haba kren sha ki lad pathai khubor.
Ki jaka kiba ka seng ka la pynlong ïa ka jingkhynra ha kane ka janmiet ki kynthup ïa ka Khyndai-Lad, Keating Road, Jail Road bad khamtam ha jaka pynïeng kali ka MUDA Complex.
U Bah Kharlyngdoh u la ong ruh ba kum ki kynhun seng bad kiwei pat kiba peit pyrman ïa ka jingsniew lyngba u drok, lada kim kyndit bynriew, lehse hadien 5-10 snem, ka Shillong kan long kum ka ‘Zombie City’ – ka shnong ha kaba lah ban ïohi ïa ki briew kiba kyrni ha u drok ki ban ïaid laitlan kumba long sha kiwei pat ki ri nongwei.
Haba kdew ba ka Sorkar Jylla kumjuh ka tnad pulit ki la lah ban rat dyngkhong bad pynkhylliap lama ïa ki seng lehnoh khamtam ha Ri-Lum Garo, utei u nongïalam u la ong, “Lada ki lah ban pynkhylliap lama ïa ki seng lehnoh, balei pat ym lah ban pynduh jait noh shi syndon ïa kine ki ‘Drug Mafia’ ne ki nongkhaïi drok ha Shillong?”
“Ngi kum ka seng, ngi hap ban buh jingkylli ba don aïu sha lyndet, ngi hap ban ong kumta namar kum ban shu ïathuh, ba wat ki briew jong ka aiñ ruh, ngi lap bad ngi sakhi, ki don kiba dih bad pyndonkam drok,” u la kynnoh.
Ha kawei ka liang, u la kyntu ba ka Sorkar khamtam ka tnad pulit ba kin ym leh kamkai ïa kane ka kam namar kumba la sakhi ha ki khyndiat snem ba la dep, ka jingsniew na u drok ka ïalam ruh sha kiwei-kiwei ki kam be-aiñ kum ka jingpynïap briew, ka jingtuh-jinglute nalor kiwei-kiwei.
“Ka Jylla ka donkam ïa ka jingïatreilang bad ngi kyntu ïa ka tnad pulit, sngewbha kumba phi la lah ban pyntroiñ ïa ki seng lehnoh, pyntroiñ shi syndon ïa ka jingkynrei jong u drok ha nongbah Shillong,” u la ong.
Ka seng ha kajuh ka por, ka la thang noh ïa kumba 30 tylli ki tyndong rit ba song ïa u ‘powder’, u kynja, ki thyrnia injek ba la ïoh kurup na kitei ki briew.
“Lada ngi lap kum ïa kine, ngi pyni beit ba ngi long khuid bad ngin thang haba shit haba shai,” u la ong.
Shuh shuh u la bynrap, “Ngi kyntu ïa kiwei ki kynhun seng ban mih shakhmat, Dorbar Shnong bad tnad pulit. Nga kyntu ïa kane ka Sorkar ba lada phi ieid ïa ka pateng ka ban wan bad kaba mynta, sngewbha leh eiei. Donkam trei lang ban rat dyngkhong bad ka Sorkar ka dei ban shim khia bad wanrah ïa ki jaka sumar (Sorkar) ban ïarap ïa kiba kyrni ha u drok.”
