Shillong, Jymmang 10
Ki BSF Meghalaya ha ka 9 tarik Jymmang, 2024, ki la ïoh ban kem ïa arngut ki briew kiba dei ki nong India ha ryngkat ka pisa Bangladesh kaba haduh 3.40 lak Taka hajan ka khappud jong ka East Khasi Hills district ka jylla Meghalaya.
Ha u kyrwoh khubor, la ong ba ki shipai jong ka 4th Battalion BSF ki la pynlong ïa ka jingkhynra bad peit bniah ha ki bynta khappud kiba hap ha Nayabazar Border Outpost bad ha kane ka por ki la ïoh ban kem ïa arngut ki briew kiba dei ki nong India bad kiba dang wan na ki thaiñ khappud jong ka Bangladesh.
Ïa kine kiba la shah kem la tip kyrteng kum u Balanus Mawroh na ka shnong Nongjri Wahsier bad u Enterness Khongsni na ka shnong Nongjritluh, East Khasi Hills. Ha ka por ba la pynlong ïa ka jingtalasi ïa kine ki arngut, ki BSF ki la la ïathuh ba ki la lap ïa ka pisa kaba don 3.40 lak Taka. Ka Taka ka dei ka pisa jong ka Bangladesh.
Ki BSF ki la ong ba la suba ruh ba kine ki briew ki la pyndonkam da ka pisa Bangladesh da ka jingthmu ban jam sha shiliang khappud bad ban pynïaid ha ki kam be-aiñ. Na ka liang ki BSF hadien ba la dep ban pynlong ïa ka jingtohkit ki la aiti noh ïa kine ki briew sha ki pulit ka Pynursla na ka bynta ka jingtohkit kaba bniah.
