Shillong, Jymmang 12
Uwei na ki dkhot ka Syngkhong Rympei Thymmai (SRT) u bym kwah ban pynpaw kyrteng, u la ong shisien ba ïa ki khun la ai jait sha u kpa, kata ka kyrteng Meikha bad ka Tangjait ka la duh noh.
Haba ïakren kyrpang bad une u rangbah ha ïing sah jong u ha kawei ka jaka ba u sah ha Shillong, u la ïathuh ka kyntien Meikha ka mih lada ai jait sha ka kmie namar ki khun haba ki leit kai sha ïing u kpa ki hap khot meikha ïa ka kmie jong u kpa. Hynrei shisien ba la ai jait sha u kpa kane ka kyntien ka la duh namar u shynrang u la ïoh lok u wan ïalam sha ïing jong u.
U la ong ka kyntien tangjait ruh ka la duh la dam syndon haba la ai jait sha u kpa namar kane ka tangjait ka la pynmih shibun ki jait hapoh ka ri Khasi haba u shynrang Khasi u ïoh da kawei ka jaidbynriew u hap ban Tangjait namar um lah ban ai jait sha lade.
U la ong haba la shim jait sha u kpa lada u ïoh ïa ka lok na kawei ka jaidbynriew ym donkam shuh ban tangjait bad ki kynthei haba ki la ïoh na kiwei ki jaitbynriew ruh ki hap ban bud lang ïa u shynrang.
“Nga ruh ïa ka khun nga la shim jait halade bad ïa ka lok ruh ka la ai jait sha nga bad u khun shynrang lada u ïoh lok ruh un shim jait halade bad un wan lam sha ïing, katba ïa ka kynthei lada ka ïoh ïa u lok uba kloi ban shim jait ha u ruh nga pdiang beit” u la ong.
U la buh jingkylli ruh, balei ki briew ki kren tang ïa kiba ai jait kpa katba ïa ki kynthei Khasi kiba ïoh lok bar jylla kiba byllai kim don ba kren?
Namar kata, une u rangbah u don jingkyrmen ba kum ka jaitbynriew kan sa ai jait lut sha u kpa khnang ban khlaiñ ka khaïi ka pateng kumba long lem kiwei ki jaitbynriew ha ka pyrthei.
Shuh shuh u la ong biang ba kito ki khun samla lada ki leit pule sha America ki shah buh bun tylli ki jingkylli namar u kpa bad ka kmie la ka jong ka jait. Kumta bun ki samla ki hap ban wanphai biang tang ban pynkylla ïa ka jait sha u kpa namar ki ri ka pyrthei baroh ki ai jait sha u kpa ym sha ka kmie.
