Nongpoh, Jymmang 12
Uwei u rangbah u la duh noh syndon ïa la ka jingim hadien ba la suba ba u la shah pynïap harud lynti jong ka shnong Erpakon ha Ri-Bhoi.
Ïa ka met jong u la lap da ki nongshong shnong ba la thiah lyngktar harud lynti hapdeng ka jinglyngkien ka snam ba la mih na ki bynta jong ka shkor.
Kane ka jingjia ka la jia hynnin ka miet ha ka por kumba 8:00 baje eiei ha kaba utei u rangbah ba la tip kyrteng kum u Kyrmen Lyngdoh Nonglait, 38 snem ka rta, uba shong ba sah ha ka shnong Erpakon u la thiah lyngktar harud lynti hapdeng ka jinglyngkien ka snam bad mar-mar na ka liang ki nongshong shnong ki la pynkit noh ïa u sha Civil Hospital ha Nongpoh. Hynrei namar ka jingphlei snam kaba jur ki doktor ki la pynbna noh ba u la khlad noh na kane ka sla pyrthei.
Haba ïakren bad ki nongïalam shnong ba kynthup ïa u Bah Michael Thongni, Rangbah Shnong bad u Bah Lambor Kharshilot, ki la pynpaw ba katei ka jingjia ka la jia hynnin ka miet ha kaba ym lah ban tip mano ba leh ïa katei ka kam hynrei na ka liang ki bahaïing ki don ka jingsuba ïa ki briew kiba donkti ha katei ka kam ban shim noh ïa ka jingim jong utei u rangbah.
Kum ki nongïalam shnong ki la pynpaw ruh ka jingsngewkhia halor katei ka jingjia haduh ban da shim noh ïa ka jingim briew, bad na ka liang ki bahaïing ki la dep ban ujor da ka ejahar ha thanat Nongpoh.
Ïa ka met jong utei u rangbah la rah noh sha NEIGRIHMS ha Mawdiangdiang ban leh ïa ka ‘Post Mortem’ bad ki pulit ki dang pynlong ïa ka jingtohkit halor katei ka jingjia ban lap ïa ki briew ba donkti.
