Shillong, Jymmang 12
U Myntri Rangbah ka Assam, u Himanta Biswa Sarma u la kren da kaba shai ba ka kynhun NDA kaba ïalam da ka BJP ka donkam ban ïoh 400 ngut ki MP ka Ïingdorbar Thawaiñ Lok Sabha khnang ban pyntreikam ïa ka Uniform Civil Code (UCC) ha ka ri ban tei ïa ka temple kaba shong khia ha Krishna Janmasthan ha Mathura.
U Himanta u la pynpaw ïa kane haba u leit ïalap ilekshon na ka bynta u kyrtong ka BJP u Giriraj Singh uba dei ruh u Myntri ka Sorkar Pdeng ha ka jingïalang ha Begusarai.
Ka UCC ka dei ka aiñ kaba long lang kumjuh ïa baroh ki nongshong shnong ka ri India.
U Himanta u la ther ruh ïa ka Congress bad ïa ki paralok jong ka halor ka jingbuh jingkylli haba ïadei bad ka jaka ha khappud bad ka Pakistan ka Pakistan-occupied Kashmir (PoK).
Une u Myntri Rangbah ka Assam bad u nongïalam ka BJP u la ong ba ka NDA hapoh ka jingïalam u Myntri Rangbahduh ka ri, u Narendra Modi ka dei ban jop palat 400 ngut ki MP ha kane ka ilekshon khnang ban pyntreikam ïa ka UCC, ban tei ïa ka temple bad ban pyntikna ba ka PoK kaba dei ka bynta jong ka India kan wanphai biang sha India.
Haba bteng ban ther ïa ka Congress bad ki paralok jong ka, u Himanta u la ong ba u nongïalam ka Congress u Rahul Gandhi bad u nongïalam ka RJD u Lalu Prasad kim shym la wan ïashimbynta ha ka por ba plie ïa ka Ram Lalla ha Ayodhya bad u la ong ba u Rahul Gandhi ne Lalu Prasad kin nym ïoh da lei-lei ruh ban leit jngoh ïa ka Ram Temple ha Ayodhya.
U la kynnoh ruh ba ka Congress ka dei kaba ju ai bhah da kaba pynshong nongrim katkum ka niam.
