Shillong, Jymmang 12
U nongbud jong kawei ka trok kaba la leit ban tynrah ïa kawei ka dukan hajan thanat Madanrting ha ka miet Sngi Saitjaiñ u la khlad noh ha shen katba u nongñiah u la mynsaw jur bad la pynkit noh ïa u sha jaka sumar.
Katei ka trok kit nar-rot kaba don ïa u nombor ML-05-R-9977 kaba dang wan na ki thaiñ Mawblei ka la rat ïa katto-katne ki kali kiba ïaid ha surok shwa ban leit tynrah ïa kawei ka dukan kaba don hajan thanat Madanrting.
Katkum ka tyllong khubor na ki pulit, la ong ba katei ka jingjia ka la jia ha ka por kumba 9:45 baje mynmiet bad la suba ba ka daw ka lah ban dei namar ka jingbym lah tehlakam shuh jong u nongñiah ïa ka kali kaba la pynlong ïa katei ka trok ban rat ïa kumba lai tylli ki kali kiba ïaid ha surok shwa ban leit tynrah ïa katei ka dukan.
Ïa u nongñiah la tip kyrteng kum u Saman Ali na Goalpara Assam.
Namarba ka trok ka la sahkut ha katei ka dukan, ym shym lah ban sei ïa ki briew kiba don hapoh jong ka bad ki pulit kumta ki la pyntip noh sha ka Search & Rescue Team jong ka Fire & Emergency Service khnang ban ïoh sei ïa kitei ki 2 ngut.
Ka kynhun jong ka SRT ka la pyndonkam da ki kor ban ot ïa katei ka trok khnang ban ïoh sei ïa kitei ki 2 ngut kiba sahkut hapoh jong ka.
Kane ka la neh la katto-katne kynta bad haba khatduh la lah ban sei noh ïa kitei ki 2 ngut napoh katei ka trok.
Ïa utei uba la khlad, la pynkit noh sha Civil Hospital, Shillong ban leh ïa ka ‘Post Mortem’ shwa ban aiti ïa ka met sha ki bahaïing hasem.
