Nongstoiñ, Jymmang 12
Ka Khasi Students’ Union (KSU) Mawshynrut Circle ka la maham da kaba tyngeh ba lada nangne shakhmat ka dang ïai lap ïa ka jingïaid laitlan jong ki bar Jylla lyngba ka ‘Infiltration Check Gate’, kam banse ban buh hi noh ïa kaba kum kane ka khyrdop peitngor ha ki jaka ba ju rung ki bar Jylla.
Ha ka kyrwoh khubor, ki nongkitkam ka KSU katei ka Circle ki la ong ba ha ka Sngi Sait-jaiñ hapoh ka jingïalam u samla Korbar Marthong, Assistant Organising Se-cretary, KSU Mawshyn-rut lem bad ki dkhot ki la ïoh bat ïa kawei ka kali ‘pick-up’ kaba don ïa u nombor AS- 18-AC-6193 kaba dap smam da ki bar Jylla kaba la rung lyngba ka ‘Infiltration Check Gate’ kaba don ha Aradongnga.
Shuh shuh ki la ïathuh ba ha ka jingtohkit jong ka KSU, kitei ki bar Jylla ki la ïathuh ba ki mut ban leit trei sha Ummulong ha ka thaiñ Ri-lum Jaiñtia.
Ki la ïathuh ruh ba na ka liang ka KSU hadien ba ka la pan ïa ki kot ki sla, kim don wat ban pynshisha ba ki dei kita ki nong India. Kumta mar-mar na ka liang ka seng ka la pynphai noh ïa kitei ki bar jylla bad ïa ka kali kaba wan rung be-aiñ sha ka Jylla khlem ki kot ki sla kiba biang.
Ka KSU ka la ther tyngeh ruh ïa ka tnad ‘Infiltration’ kaba shu pyllait laitlan khlem da peit bniah ïa ka jingrung jingmih ki bar jylla lyngba katei ka khyrdop bad ka la maham tyngeh ba nangne shakhmat lada ka dang ïai lap ïa kiba kum kitei, kam banse ban buh hi noh ïa ka ‘Infiltration Check Gate’.
