Shillong, Jymmang 12
Ka jingthep ‘vote’ na ka bynta ban jied MP Lok Sabha ha ki 96 tylli konstitwensi kiba don ha ki 10 tylli jylla, kaba long ka bynta kaba saw jong ka ilekshon, kan long ha ka Lah Sngi U Blei.
Ha kane ka bynta, ha ki 96 tylli konstitwensi Lok Sabha, ki don haduh 17.7 klur ki nongthep ‘vote’, bad 1.92 lak ki ‘Polling Station’.
Nalor jong ka jingthep ‘vote’ ban jied MP, lashai ka sngi kan dei ruh ka jingjied ïa ki MLA bathymmai ka Ïingdorbar Thawaiñ ha Andhra Pradesh (175 tylli ki konstitwensi) bad Odisha (28 tylli ki konstitwensi).
Na ka liang ka Election Commission jong ka Ri India (ECI), haba ai ïa kitei ki jingtip, ka la ong ba ka jingthep ‘vote’ ha ki katto-katne ki jaka kiba don ha ki 17 tylli konstitwensi Lok Sabha ha Telangana kan long naduh ka por 7 baje mynstep haduh 6 baje janmiet.
Nalorkata, ka ECI ka la ong ba katkum ka jingpyntip jong ka IMD, kan ym don satia ka jingshit kyrang lane ka ‘heat wave’ ha kitei ki jylla ban don ka ilekshon lashai ka sngi.
Shuh shuh ka ECI ka la ong ba haduh mynta ba la pyndep ïa lai bynta jong ka jingjied MP, ka ilekshon ka la long kaba ïaid beit ha ki 283 tylli konstitwensi kiba don ha 20 tylli ki jylla.
Ha kitei ki 96 tylli konstitwensi, ki don haduh 1,717 ngut ki kyrtong kiba ïakhun, bad haba kheiñ kyllum, ki don ym duna ïa ka 18 ngut ki kyrtong ha kawei ka konstitwensi.
Ki 10 tylli ki jylla ba don kitei ki 96 tylli konstitwensi ki kynthup ïa ka Andhra Pradesh, Bihar, Jammu & Kashmir, Jharkhand, Madhya Pradesh, Maharashtra, Odisha, Telangana, Uttar Pradesh bad West Bengal.
