Shillong, Jymmang 12
Na ka jingtih dewïong thliew khnai, uwei u samla na East Jaiñtia Hills u la poi pat sha ka kyrdan doktor ban sumar ïa ki para briew, bad kane ka dei ka jingim jong u Dr Kampher Pala.
Halor kane, ka Myntri ka tnat ka koit ka khiah, ka Kong M Ampareen Lyngdoh, ka la sam khubor ha ka Sngi U Blei lyngba ki rynsan ‘Social Media’ halor u Dr Kampher, ha kaba ka la ong, “Na ki jingjylliew jong ki krem dewïong sha ki kyrdan jong ka jingjop ha ka jingpule doktor, ka jingïaid lynti jong phi ka long kaba ai mynsiem.
Ka jingim jong phi ka dei kaba pynshisha ïa ka jingkordor jong ka jingtrei shitom bad ka jingkut jingmut kaba skhem. Nga ai ruh ïa ka jingkhublei bakyrpang ïa ka We Care Foundation kaba la kyrshan ïa phi ha ka lynti ïaid bad kaba la wanrah shisha ïa ka jingkylla ha ka jingim jong phi ban long kum u doktor.”
Ka We Care Foundation ka dei kaba la ïalam da u doktor uba pawkhmat ha kane ka jylla, u Dr Bishnu Ram Medhi bad ka la sdang ban treikam ha u snem 2015. Nalor jong u Dr Medhi, ki don ruh sa kiwei pat ki doktor kiba ïa kit ïa bah ïa ki kam ki jam jong kane ka kynhun. Ki kam jong kane ka kynhun ka long ban pynlong ïa ka jingpeit bniah ïa ka koit ka khiah ki para briew khlem da donkam ban siew, bad ïa kine ki jingpeit bniah la ju pynlong la kumno-kumno lai sien ha ka shi snem.
Ym tang katta, katei ka Foundation ka ai jingïarap bad jingkyrshan ruh ïa ki samla pule kiba wan na ki longïing longsem baduk bad jynjar.
Uwei na kitei kiba la ïoh jingkyrshan na katei ka We Care Foundation u dei u samla Kampher Pala na East Jaiñtia Hills. Ka Foundation ka la jied ban kyrshan ïa une u samla ban pule doktor ha Gauhati Medical College (GMC).
Katkum ki khubor ba la pynmih dang katto-katne snem mynta, la ong ba u samla Kampher u ju trei ha ki krem dewïong ryngkat bad u kpa jong u. La ong ba u la hap ban trei shitom ha ki aïom tlang khnang ba un ïoh pisa ban thied kot thied sla ha shwa ban plie skul.
La ong ruh ba ki kmie ki kpa jong u samla Kampher ki ju kamai ha ka por mynsngi khnang ban ïoh thied bam ha ïing ha sem ha ka por mynmiet.
Shuh shuh la ong ba hadien ba u la pyndep ïa ka High School, u la shah khot ha ka We Care Foundation. Mar ïa dep ïa ka jingpule ha ka Klas XII, u la pyndep ïa ka National Eligibility-cum-Entrance Test (NEET) bad u la ïoh ban pule ha GMC da ka jingkyrshan jong ka We Care Foundation.
