Nongstoiñ, Jymmang 12
Ka jingnang jyllei jong ka jingmih ki kam sniew kum u drok bad kiwei pat ha ki bynta jong ka sor Nongstoiñ bad ha West Khasi Hills District ka la wanrah ka jingsngewkhia ym tang ïa ka tnad pulit kaba ïai peitngor na ka por sha ka por hynrei ïa kiba bun balang, kumjuh ïa ki kynhun seng bapher-bapher.
Halor kane ka bynta, bad da ka jingsngewkhia, ka Hynñiewtrep Youths’ Council-Nongstoiñ Circle (HYC-NC) ha ka 11 tarik u Jymmang, 2024 hapoh ka jingïalam u General Secretary, samla Ïainehskhem Ryntathi-ang, Vice-President, sam-la Golden Syiemlieh ka Circle, Organising Sec-retary, samla Wilson Marthong ryngkat ki para dkhot jong ka seng ki la leit ban khynra ha ïew Nongstoiñ halor ka jingdon jong ki nongdih bad ki nongdie drok ha katei ka jaka.
Ki nongkitkam ka HYC ki la pynpaw ba ha katei ka jingleit khynra, ka seng ka la lap bad ïoh bat haduh 5 ngut ki nongdih bad ki nongdie drok.
Nalor nangta, ki la ïathuh ba ka seng ha katei ka jingkhynra ka la lap ïa ki tiar ki tar ba ki pyndonkam ban dih drok kynthup ki thyrnia injek ba ki pyndonkam bad kiwei pat.
Ki la ong ruh ba hadien kane, ka seng ka la pyntip ruh sha ki pulit ka thanat Nongstoiñ ha kaba ki la thang noh ïa kine ki tiar ki tar baroh hakhmat jong ki pulit.
Shuh shuh la ong ruh ba ha katei ka sngi, ka seng ka la aiti noh ïa kitei ki 5 ngut sha ki pulit ha ryngkat ka jingkyntu ïa ki bor jong ka aiñ ba kin leh ïa kaba donkam.
