Shillong, Jymmang 12
Wat la ka shnong Lapangap kaba hap ha Nartiang constituency, West Jaiñtia Hills District ka la wanphai biang ka shongsuk-shongsaiñ hynrei ki don pat ki runar kiba leit thang ïa ka ïing trep ne ka ktem ba ju shong ki pulit Assam ha jaka rep ka shnong Lapangap ha kine ki taïew ba dang shu dep.
Haba ïoh ban ïakren bad u Bah Deimon Lyngdoh uba dei u Waheh Shnong Lapangap, u la ïathuh ba mynshem taïew ki briew uba la suba jur ki dei ki jaidbynriew Karbi ki la leit thang ïa ka ïing trep ba ju shong ap pahara ki pulit Assam ha jaka ba ju rep ki briew na ka shnong Lapangap tang ban ïoh kynnoh ïa ki briew ka shnong Lapangap.
“Ha kane ka ïing trep ki pulit Assam ki ju wan ar haduh lai ngut ban shong ap pahara hynrei haduh ka por 9:00 baje mynmiet ki la mih noh na katei ka jaka” u la ong.
U la ïathuh hadien ba ki pulit Assam ki la ïoh jingtip ïa kane ki la wan kumba ar kali ha katei ka jaka bad mynta ki la shna syndon da ka ïing ba la ker da ka tin.
Nalor nangta, u la ïathuh ruh ba ki pulit Meghalaya kiba don ha shnong Lapangap ki la leit noh mar shu kut ot kba ha u Naiwieng 2023 hadien ba ka shongsuk-shongsaiñ ka la wanphai biang katba ki pulit Assam ki dang don haduh mynta kiba wan ap pahara.
“Wat la ka shongsuk ka la wan hynrei ngi la ïa kiar ban ïa leit khaïi-pateng mar kylliang ban ai bylla ruh ngim treh shuh naduh ba la mih ka huri-hura” u la ong.
U la ïathuh ba wat la kim treh shuh ban khaïi-pateng mar kylliang, hynrei ki Khasi kiba sah ha Lapangap ki la leit rep ha ki lyngkha jong ki shaduh ki jaka ba ju ïakajia.
