Nongpoh, Jymmang 13
Ka jingtih khyndew be-aiñ ha ka thaiñ Ri Bhoi District kaba hap naduh Byrnihat ter ter shaduh sha Khanapara da katto-katne ki ‘riew shimet, ka la wanrah ïa ka jingjot kaba khraw ïa ki lum ki wah. Halor kane bynta ki la don ruh shibun ki jingujor na ki ‘riew paidbah sha ka shlem treikam jong u Deputy Commissioner (DC) ka Ri Bhoi ban kyntu ba u dei ban shim khia ban tehlakam ïa kitei ki jait kam kiba ktah shikatdei ïa ka mariang sawdong sawkun.
Halor kane ka bynta, u Deputy Commissioner ka Ri Bhoi, u Arpit Upadhyaya haba kren sha ki lad pathai khubor ha ka Lah Sngi U Blei u la ïathuh ba ka dei ka jingshisha ba ka shlem treikam ka jong u, ka la ïoh shibun ki jingujor halor kane ka jingtih khyndew be-aiñ kaba la ktah ruh ïa ka jingkhuid jong ka lyer.
Utei u heh ophisar jong ka district u la pyntip ba kane kam dei shuh ka sien kaba nyngkong ba ka la don ka jingujor, hynrei ha ki por kiba la dep ruh, la don teng ki jingujor bad na ka liang ka jong u, u la bthah ïa u Divisional Forest Officer (Territorial) jong ka District ba un pynlong ïa ka jingtohkit bad leh ïa kaba donkam. Shuh shuh u la ïathuh ba ka komiti kaba la thaw da ka Khasi Hills Autonomous District Council (KHADC) ruh ka la dep ban pynlong ïa ka jingjurip bad shim ïa ki sienjam.
U la ïathuh ba wat hapdeng kitei ki sienjam ba la shim da kitei ki tnat treikam, ka jingtih khyndew be-aiñ ka dang ïaid shakhmat haba ha kine ki khyndiat sngi ka la don biang ka jingujor. Kumta na ka liang ka jong u, u la bthah da u Majistor ban pynlong ïa ka jingjurip bad tohkit halor kitei ki jingujor bad na ka liang ka shlem treikam ka jong u, kan sa shim pat ïa ki sienjam kiba ïahap katkum ka jinglap jong u Majistor.
