Shillong, Jymmang 13
Hadien ba u Deputy Commissioner ka Ri Bhoi, u Arpit Upadhyaya u la phah ïa ka shithi ban pan ïa ka thup jong ki Jait ki Kur Khasi kiba don hapoh u pud u sam ka District Council jong 5 tylli ki distrik ka Rilum Khasi, ka KHADC ha ka 13 tarik u Jymmang 2024 ka la khot da ka jingïalang hapdeng ki khlieh nongsynshar lem bad ki nongmihkhmat jong ki seng Kur bapher-bapher ban ïathir-ïatai halor kumno ban buh beit bad buh ryntih ha kaba ïadei bad ki Kur ki jait kiba hap hapoh ka KHADC bad ka jingai ïa ki syrnod Scheduled Tribe nalor kiwei-kiwei ki kam Kur.
Haba ai jingkren sha ki lad pathai khubor hadien ba la wai ka jingïalang, u Bah Pynshngaiñ N. Syiem uba dei u Deputy CEM ka KHADC, u la ong ba na ka liang ka Council ka la rai ba ki Kur ki jait kiba hap hapoh ka KHADC kin don noh ïa la ka jong ka thup jong ki Kur ki jait kiba don ha Rilum Khasi kiba hap hapoh u pud u sam ka KHADC khnang ba ka jingai jait bad jingai syrnod kan long da ka lynti kaba dei bad kaba bniah bad ka bym ïatyngkhuh badno-badno.
U Bah Pynshngaiñ u la ong ba baroh ki Kur kin pyntip kham kloi sha ka KHADC ïa ki Kur jong ki khnang ba ka Council kan ïoh ban buh ha ka thup bad khnang ba ka jingpyntip paidbah kan long kaba ïaid beit ïaid ryntih khlem da don kano-kano ka jingdkoh hangne-hangtei.
“Mynta ka sngi ngi la rai ba ka Council ha kine ki khyndiat sngi kan pyntip paidbah ba ki Kur bapher-bapher kin pyntip noh kham kloi sha ka District Council ïa ki Kur jong ki khnang ba ngin ïoh ban buh ha ka thup bad ïa kata ka thup ba ngin lum jingtip ngin sa nang ïa shong biang lehse, ki don ki Kur kiba la duh noh bad ïoh don kiba Kur kiba la kum klet khnang ba hashwa ngin pyntip paidbah ïa ka thup ki Kur hapoh u pud u sam jong ka Council kan nym long kaba dkoh hynrei ka ban long kaba bha nadong-shadong”, la ong u Bah Pynshngaiñ.
Na ka liang u Bah Titosstarwell Chyne uba dei u nongïalam ka liang pyrshah hapoh ka Council u la ong ba ha katei ka jingïalang la ïakren ruh ha kaba ïadei bad ka jingai jait sha ka kmie lane ka Khasi Social Custom of Lineage Act, 1997 ha kaba u la ong ba kaba sngewtynnad ka long ba ki Kur ki jait bapher-bapher lem bad ki khlieh nongsynshar ki la kyrshan ïa ka Lineage Act bad ruh ïa ka jingpynbna ba dang shen ba la pynmih da ka tnat Social Welfare haba ïadei bad ka kam ban ai ïa ki syrnod Scheduled Tribe.
Halor ka jingdon kiba ai jait sha u kpa, u Bah Pynshngaiñ u la ong ba haduh mynta ha ka Lineage Act la kren shai ba ka jingai jait kan long beit na ka kmie bad halor kane ka bynta ruh na ka liang ka Council kan sa ïakren sani bha.
