Nongstoiñ, Jymmang 13
Ka Hynñiewtrep Youths’ Council (HYC) Nongstoiñ Circle ha ryngkat ka jingsynran ki nongïalam ka HYC West Khasi Hills District, ki longkmie ka thaiñ ha ka Lah Sngi U Blei, ka la bteng biang ïa ka jingleit khynra ïa ka ïew bad khlieh ïew Nongstoiñ ha kaba ka la lap 4 ngut kiba dih bad die drok.
Ki nongïalam ka HYC ki la ïathuh ba ka seng hadien ka jingkhynra, ka la lap katto-katne ki drok bad ka kyiad bad na liang ka seng ka la thang noh hakhmat ki pulit bad ka la aiti ruh ïa kitei ki nongdih bad nongdie sha ki pulit.
Ka seng lyngba ka kyrwoh na u Samla Olivertwist Marngar, Vice President HYC Nongstoiñ Circle, u la ong ka seng kan ïai bteng ïa ki kam khynra namar ka la ïohi ïa ka jingangnud ki paidbah ban rat dyngkhong ïa kane ka jingsniew na ka bynta ka jingbha ka thaiñ.
Ka HYC ka kyntu ïa ki bor ka aiñ ba kin leh eiei kham janai namar ka tlot eh ka aiñ, bad na ka liang ka seng ka kyntu ruh ïa u Syiem ka Hima Nongstoiñ ban pynpra noh ïa ki dukan bym donkam, namar lada buh ïa kine ki dukan khlem pyndonkam, ki long ki jaka riehtngen bad jaka ktem dih drok. Ka HYC ka kyrpad ruh ïa baroh ban ïatreilang bad ka seng na ka bynta ban wanrah ka jingshngaiñ bad ka jingbha jong ka imlang sahlang, naba ka seng kan ïai bteng beit ïa kane ka kam khynra.
