Shillong, Jymmang 13
Ka sorkar Meghalaya lyngba ka tnat Korbar Jylla, haba jubab sha ka Hynñiewtrep Integrated Territorial Organization (HITO), ka la kren shai ba ka rta thep kam pulit na ka bynta ki Scheduled Tribe (ST)/Scheduled Caste (SC) ka long beit tang hapdeng 18 haduh 32 snem ka rta, bad kane ka 32 snem ka dei hadien ba la pynjlan san snem na ka 27 snem ka rta.
Katei ka shithi ka la wan na ka Joint Secretary ka tnat Home (Police) ha ka Lah Sngi U Blei. Ha kane ka shithi sha ka HITO, ka Joint Secretary ka la kdew ïa ka hukum ba la pynmih da u Lat ha kaba ïadei bad ka rta ban rung kam ha ka tnat Excise Registration Taxa-tion & Stamps, Forests & Environment, Home (Police) and Civil Defence & Home Guards.
Ha kaba ïadei bad ka tnat pulit, ka Joint Secretary ka la ong ba na ka bynta kiba kwah ban rung sha ka kam Junior Scale MPS/Dy. Superintendent of Police (C) MPRO/Dy. Superintendent of Police (SCRB), ka rta ka dei hapdeng 21 haduh 27 snem.
Na ka bynta ka kam UB/AB Sub-Inspector, ka rta kan long hapdeng 21 haduh 27 snem katba na ka bynta ka kam Unarmed Brach Constable/Fireman/Driver Fireman/MPRO Operator/Signal Operator/Fireman Mechanic/ Mechanic, ka rta ka long hapdeng 18 haduh 21 snem.
Shuh shuh la batai ruh ba ka rta thep kam na ka bynta ki Armed Branch Constable/Battalion Constable/Handyman Constable/MPRO GD/Driver Constable kan long hapdeng 18 haduh 21 snem katba na ka bynta ka kam Follower, ka rta ka long hapdeng 18 haduh 27 snem.
Hynrei, la batai shai ruh ba na ka bynta ki samla kiba dei ki Scheduled Tribe (ST) bad Scheduled Caste (SC), yn pynjlan ïa ka rta thep kam na ka bynta san snem. Kane ka mut ba lada ka rta thep kam na ka bynta kiwei ka dei haduh 21 snem, ïa ki ST bad SC kan long noh haduh 26 snem bad lada ka rta thep kam na ka bynta kiwei ka dei haduh 27 snem, na ka bynta ki ST bad SC kan long noh haduh 32 snem. Lah ban kdew ba ha u bnai Lber, ka tnat pulit ka la pynmih ïa ka byrta ha kaba ïadei bad ka jingpynrung sha ki 2,968 tylli ki kam kiba lait.
Katkum ka byrta, ki don 2,968 tylli ki kam ha ki kyrdan bapher-bapher. Kine ki kynthup ïa 76 tylli na ka bynta ki Sub-Inspector (Unarmed Branch), 720 tylli ïa ki Constable (Unarmed Branch), 195 tylli ki Fireman, 53 tylli ki Driver Fireman, 26 tylli ki Fireman Mechanic/Mechanic, 205 tylli ki MPRO Operator, 56 tylli ki Signal/BN Operator.
Nalorkata, ki don 1,494 tylli ki kam kiba lait na ka bynta ki Armed Branch Constable/Battalion Constable/MPRO GD/Constable Handyman. Ki don ruh sa 143 tylli ki kam na ka bynta ki Driver Constable.
Haba la kheiñ kyllum, ki kam baroh kiba lait ki long 2,968 tylli bad na kine la bhah 445 tylli na ka bynta ki samla kiba dei na ka Unreserved Category, 1,187 na ka bynta ki Khasi Jaiñtia, 1,188 tylli na ka bynta ki Garo bad 148 na ka bynta Scheduled Caste bad Other Scheduled Tribes (OST). Ka tnat ka la ong ba kane ka jingai bhah ka long katkum ka ‘Reservation Policy’ jong ka jylla.
Shuh shuh ka tnat pulit ka la pyntip ba 10 na ka 100 lane 10 per cent na kitei ki kam yn bhah ïa ki kynthei lait noh sa tang ki kam kiba dei beit thik tang na ka bynta ki shynrang.
Ha kaba ïadei bad ka rta, la ong ba ki samla kynthei bad shynrang kiba thep ïa ka kam Unarmed Branch Sub Inspector ki dei ban long hapdeng 21 haduh 27 snem rta bad kiba la pyndep ym duna ïa ka Bachelors Degree na kano-kano ka ‘Stream’ bad na kano-kano ka skulbah ba la ithuh. Na ka bynta ki Unarmed Branch Constable/Fireman/ Driver Fireman/MPRO Operator/Signal Operator/ Fireman Mechanic/Mechanic, ki samla thep kam ki dei ban long hapdeng 18 haduh 21 snem ka rta bad kiba la pyndep ym duna ïa ka Class 12.
Na ka bynta ka kam Armed Branch Constable/ Battalion Constable/Driver Constable/ Handyman Constable kiba thep kam ki dei ban long hapdeng 18 haduh 21 snem ka rta bad kiba la pyndep ym duna ïa ka Class 9.
Kitei ki rta ba la kdew haneng ki dei ban long katkum ka 1 tarik Kyllalyngkot, 2024. Hynrei ïa ka rta thep kam na ka bynta ki Scheduled Tribe, Other Scheduled Tribes (OST) bad Scheduled Caste, la pynjlan da san snem.
Kane ka mut ba na ka bynta ka kam Unarmed Branch Sub-Inspector kiba lah ban thep kam ki dei kiba haduh ka 32 snem ka rta, katkum ka tarik ba la kdew haneng, bad lada ki dei ki Scheduled Tribe, Other Scheduled Tribes (OST) bad Scheduled Caste.
Na ka bynta ki kam Unarmed Branch Constable/Fireman/Driver Fireman/MPRO Operator/ Signal Operator/Fireman Mechanic/Mechanic bad Armed Branch Constable/Battalion Constable/Driver Constable/ Handyman Constable, kiba thep kam ki lah ban dei kiba la don haduh 26 snem ka rta, katkum ka tarik ba la kdew haneng, bad lada ki dei ki Scheduled Tribe, Other Scheduled Tribes (OST) bad Scheduled Caste.
Na ka bynta ki jingtip kiba kham bniah ha kaba ïadei bad kane ka byrta, kiba don jingthmu ban thep kam ki lah ban leit na ka ‘Website’ jong ka tnat pulit kaba dei www.megpolice.gov.in.
