Mawkyrwat, Jymmang 13
Katba ki Dorbar Shnong, ki Seng Samla Shnong, ki Seng Longkmie, ki VDP, ki Seng bad kiwei-kiwei ki dang ïakhun pyrshah ïa u drok ha ka dong ka thaiñ South West Khasi Hills baroh kawei, hynrei khlem jingsalia uwei u bar jylla u la tyrwa drok pynban ïa ki samla.
La ong ba ka jingïakhun ka long namar ba u drok u la sdang jyllei bha ha kane ka dong ka thaiñ, bad ha kane ka jingïakhun kaba sngewsih pat ka long ba ha ka miet jong ka 11 tarik u Jymmamg 2024 ka KSU Mawlangwir Unit ryngkat ki nongïalam ka Mawkyrwat Circle ki la ïoh ban bat ïa 5 ngut ki nongtrei bar jylla kiba mut ban wan trei ha kawei ka resort hapoh ka shnong Mawlangwir.
La ïathuh ruh ba uwei na kitei ki bar jylla u dei uba la buaid da kiwei ki jait jingdih pynbuaid bad khlem salia u la ïaid miet ïaid ïong bad haba la bat ïa u da ki briew bad ki dkhot ka KSU, utei u bar jylla u la tyrwa pynban ban pynïoh drok bad kynja ïa ki da kaba u mutdur ba ki ruh ki dei ki nongdih drok.
Ïa utei u bar jylla la wan shimti noh da ki pulit jong ka thanat Mawkyrwat bad na ka liang ka KSU Mawkyrwat Circle lyngba u samla Rutherford Lyngdoh President bad samla Plosbor Kharjahrin General Secretary haba kren sha ki lad pathai khubor ki la pynpaw ïa ka jingbitar khamtam kitei ki bar jylla ki dei ki bym biang ki kot ki sla bad ka shnong ruh kam don ka jingtip eiei halor ka jingwan trei kitei ki bar jylla.
Kumta na ka liang u samla Rutherford Lyngdoh u la maham tyngeh ïa ki briew kiba wanrah nongtrei bar jylla kumjuh ruh ïa ki bor district ba haba ki ai jingbit ïa kino-kino ki bar jylla ban wan trei hapoh ka thaiñ Mawkyrwat ki dei ban da peit bniah bha ym ban ai kulmar ïoh kin ber bih kylla ïa ka imlang-sahlang.
