Shillong, Jymmang 13
Bun ki jaka ha thaiñ nongkyndong ki la shongdum ha kine ki khyndiat sngi namar ka jingbym don ka bording ilektrik na ka daw ka jingsniew jong ki laiñ ba pynïaid ïa ka bording. Ki nongshong shnong ha nongkyndong ki la bynñiaw namar man ka por ka bording kam ju meh tista hynrei ka don beit ka jingthut man la ka por.
Hynrei ki la ïathuh ba ha kine ki khyndiat sngi, ka bording ilektrik ka la lip da ki bun kynta bad ha ka por mynmiet ruh ka khlem meh.
Na ka liang ki heh ophisar ka MeECL ki la ïathuh ba ka jinglip ka ilektrik ha kiba bun ki shnong ha thaiñ nongkyndong khamtam ha Mawryngkneng bad Mawkynrew kaba la neh kham bun kynta ka dei na ka daw ba sniew ki laiñ ba pynïaid ïa ka bording bad jingkhie ka lyer kaba jur ha ki sngi ba la leit kaba ktah kynsan ïa ki laiñ ba pynïaid ïa ka bording ilektrik.
Kumta ka MeECL ka la phah ruh kham bun ki briew ban shna bad pynïaid biang ïa ka laiñ ban sam bording ilektrik ha kaba ki dang don ki jaka kiba ym pat lah ban pynïoh biang ïa ka bording.
Ha ïakren bad u CMD ka MeECL u Sanjay Goyal u la ong ba ki don ki jaka kiba kham saja ban leit peit khamtam ban lap ïa ka jingthut jong ka laiñ bad ka don ka jingslem ban pynïoh biang ïa ka ilektrik ha kito ki jaka.
Kumta u la ong ba ki briew ka MeECL ki la trei shitom ban pynbiang ïa ka jingdonkam jong ki nongshong shnong ha kylleng.
