Shillong, Jymmang 13
Ki pulit, ha ka Lah Sngi U Blei, ki la pyntip ba kawei ka nongshong shnong ïa kaba la tip kyrteng kum ka Kong B Wanswett, ka la ujor ba u nongñiah kali jong ka, u la rah ïa ka kali Bolero (ML-05 AB – 5861) khlem ka jingai jingbit jong ka naduh ka 8 tarik Jymmang, 2024, bad haduh mynta u khlem pat wanphai ne pynphai ïa ka kali. Ha kajuh ka por, la ujor ba utei u nongñiah u khlem jubab wat hadien ba ka trai kali ka la ‘phone’ ïa u la bunsien.
Ha kawei pat ka jingjia, u Shah Ejaz u la ujor ba ha ka 9 tarik Jymmang, ki runar ki la tuh ïa ka thuk-thuk (ML-05AA-6729) na ka ïing sah jong u ha Lower Lumparing, Jackson Trace Road, Shillong.
Shuh shuh ki pulit ki la pyntip ba ki la ïoh jingtip ba ha ka 11 tarik Jymmang ha ka por kumba 4 baje mynstep, artylli ki thuk-thuk, kawei kaba don ïa u nombor ML-05T-4893 kaba dei jong u Larry Synrem bad kawei pat kaba don ïa u nombor ML-05Z-5871 kaba dei jong u Jeff E Marie, ki la shah tuh na Pohktieh, Nongthymmai, Shillong.
Nalorkata, ki pulit ki la ong ba uwei u briew ïa uba la tip kyrteng kum u Nobor Ali u la ujor ba ha ka 8 tarik Jymmang, ki runar ki la tuh kumba 30 byrni u kwai na kawei ka jaka kaba don ha ka shnong Nimaikata ha West Garo Hills.
Ha kawei pat ka jingjia, ki pulit ki la ong ba kawei ka longkmie na ka shnong Nongkseh Nongmadan, Upper Shillong ka la ujor ba ha ka 30 tarik Ïaïong, 2024, ki runar ki bym lah ban ithuh, ki la shoh la dat ïa u khun jong ka ha Nongkseh Block-VII, Upper Shillong. Na ka daw jong ka jingmynsaw namar kane ka jingshah shoh, la hap ban pynkit ïa u khun jong katei ka longkmie sha NEIGRIHMS ba un ïoh ïa ka jingsumar.
Shuh shuh ki pulit ki la ong ba uwei u briew ïa uba la tip kyrteng kum u Paul Roy Paske na Nakam Bazar, Tura, u la ujor ba ha ka 4 tarik Jymmang ha ka por kumba 8 baje mynmiet, u la lap ba ki runar ki la tuh ïa u ‘battery’ na ka kali jong u.
Ha kawei pat ka jingjia, u Augustine Ch Marak, u la ujor ba ha ka miet jong ka 9 tarik Jymmang, ki runar ki la pyrshang ban tuh ïa ka umphniang ‘Diesel’ na u Tower uba don ha Rombachisakgre, West Garo Hills. Hynrei kitei ki runar ki la ïoh ban phet krad na katei ka jaka bad ki la iehnoh shadien ïa kawei ka ‘Mobile Phone’ bad uwei u klong umphniang.
