Phulbari, Jymmang 13
Ha kawei ka jingjia kaba la jia ha ka 11 tarik Jymmang ha ka shnong Chibinang, ka kynhun jong bun ngut ki runar ka la leit rung ha ka ïing jong uwei u nongshong shnong ha katei ka shnong, da kaba kynnoh ba ka kynhun ka la rah lang ïa ki tari bad ki dieng ban shoh ban dat ïa 4 ngut ki briew kiba don ha katei ka ïing, katba ki dang ïa bam ja.
Kawei na ki lanot kaba la ngat ha katei ka apot ka dei ka kynthei.
Katkum ka ejahar ba la ujor da ki lanot, ka kynhun heh paid kaba kynthup ïa palat 20 ngut ki briew, ka la rung jubor shapoh ïing da ka jingthmu ban thombor ïa u paralok uba la leit jngoh ïa katei ka longïing.
Wat la ka daw tynrai jong katei ka jingjia ym pat lah ban tip naba ka jingtohkit ka dang ïaid, katei ka kynhun ka la wan ha ryngkat ki tiar pynmynsaw.
Haba ki dkhot jong katei ka ïing ba kynthup ïa ka kurim jong u trai ïing ki la pyrshang ban tuklar ban ïarap ïa la u paralok, ma ki ruh ki la shah thombor.
Katei ka jingjia ka la jia ha ka por kumba 10:30 mynmiet ha ka shnong Chibinang ha ka 11 tarik Jymmang katba ïa ka jingujor ha ki pulit, la ujor ha thanat Phulbari ha ka sngi kaba bud, 12 tarik Jymmang. Katei ka kynhun kaba la thombor ïa ki ka dei ka kynhun ki khynnah shynrang.
“U paralok jong nga u la wan bam ja sha ïing bad katba ngi dang ïa bam, ka kynhun kaba palat 20 ngut ki briew ka la rung jubor hapoh ïing bad pyrshang ban shoh ïa u paralok jong nga. Ma nga, sa uwei uba shipara arkmie bad nga lem bad ka kurim jong u, ngi la pyrshang ban ïada ïa u, hynrei ki la shoh lang ïa ngi ruh,” la ong uwei na ki nongujor.
U trai ïing lem bad ka ïing ka sem jong u, u la kyrpad ïa ka katei ka kynhun ban sangeh ïa kaei kaba ki leh, hynrei kim shym la sngap. Ha katei ka jingjia, ka kurim jong uba shipara arkmie ka la shah jrong kti ha katei ka kynhun bad ka la mynsaw ruh ïalade.
“Kane ka bym lah pdiang da lei-lei ruh bad kam pat ju jia koit mynshuwa ha ka thaiñ jong ngi. Kine ki jait jingjia ki lah ban wanrah ka jingïakynad hapdeng ki jaidbynriew, kaei-kaei kaba ka thaiñ kam pat ju ïohi,” la ong ki nongujor ha ryngkat ka jingdawa ban pynshitom da kaba tyngeh pyrshah ïa kito kiba donkti ha katei ka kam.
Ka ejahar na ki 4 ngut ki lanot ka la jer kyrteng ïa kumba 7 ngut ki briew da kaba bynrap ba ki dang don shuh kiba donkti.
Haba pyntikna ïa katei ka jingujor, u SP ka WGH, u Dara Aswaghosh u la ong ba la dep ban ujor ejahar bad ka jingtohkit ka la ïaid shakhmat. Hynrei ym pat shym la kem ïano-ïano.
Na ka liang u MLA ka thaiñ bad Myntri ka tnad bording, u A.T. Mondal u la pynrem jur ïa katei ka jingjia.
