Shillong, Jymmang 13
Ha kawei ka jingjia kaba ki paidbah ki dei ban tip bad husiar, ki pulit, ha ka Lah Sngi U Blei, ki la ong ba la don uwei u nongshong shnong ka nongbah Shillong uba la shah pynbor ha ki nongshukor ban siew haduh T.1 lak.
Utei u nongshong shnong u dei ba shong ba sah ha kawei na ki jaka ba hap hapoh ka jingpeit jong ka thanat Madanrting. Katkum ka khubor na ki pulit, la ong ba utei u nongshong shnong u la ïoh ïa kawei ka ‘phone call’ ha ka 4 tarik Jymmang na ka kompani ‘Fedex’. Kane ka dei ka kompani ba ju pyndonkam ban phah rah ïa ki tiar bad ki mar bapher-bapher.
Ki pulit ki la ong ba kita ki briew kiba la ïakren bad utei u nongshong shnong ki la pyntip ba la pyndonkam ïa ki jingtip jong u ban phah tiar sha Thailand. La ong ruh ba kita kiba kren bad u ki la bthah ïa u ba u dei ban ujor sha ki pulit ka nongbah Mumbai halor kane.
Ym tang katta, ki pulit ki la ong ba kita kiba ïakren bad utei u nongshong shnong ki la pynbor ïa u ba un sei bad ai haduh T.1 lak na ka jaka kynshew pisa jong u.
Kiba kum kine ki jingjia kim dei kiba dang thymmai bad kim dei ruh kiba jia tang ha kane ka nongbah. La ïoh jingtip ba ki la don ki nongshong shnong ha kiwei pat ki jylla jong ka Ri ki la ju ngat teng ha ka jingshah shukor kaba long kumjuh kumba ngat utei u nongshong shnong na Shillong.
Namarkata, ki paidbah ki dei ban long kiba husiar haba don kiba pyntip sha ki ha kaba ïadei bad kiba kum kitei ki khana.
