Shillong, Jymmang 13
Ka Sorkar Jylla ka la thoh sha ka Sorkar Pdeng namar ka jingmad jingeh haba pyntreikam ïa ka Mahatma Gandhi National Rural Employment Guarantee Scheme (MGNREGS) kaba dei ka skhim bylla sngi namar ka jingsahteng ka pisa bai thied tiar (material component) bad ka rukom siew bainong lyngba ka Aadhaar-based payment system (ABPS) ïa kiba trei bylla hapoh kane ka skhim ha kaba kito kiba don ‘job card’ ki hap ban pynïasoh beit ïa u Aadhar bad ka jaka kynshew pisa.
Baroh shikatta, kiba don ‘job card’ ki ju ïoh ïa ka bainong jong ki ha ka jaka kynshew pisa jong ki khlem da donkam ban pynïasoh Aadhaar. Hynrei naduh u Kyllalyngkot mynta u snem, ka Sorkar Pdeng ka la bthah ba baroh kiba don ‘job card’ hapoh ka MGNREGS ki dei ban pynïasoh ïa u Aadhaar bad ka jaka kynshew pisa jong ki, lym kumta ym lah ban phah sha ka jaka kynshew pisa ïa ka bainong kaba ki la trei bylla.
Haba ïakren bad u Myntri ka tnat Community & Rural Development, u AT Mondal u la ong ba ka jingsahteng ban pyllait pisa na ka bynta ka bai thied tiar ka buh jingeh ban siew ïa ka bai thied tiar haba pyntrei ïa ki projek MGNREGS ha ki shnong ki thaw.
Hynrei u la ong ba kaba kham buh jingeh shuh shuh ka dei ka rukom siew bainong ha kaba kito kiba don ïa ka ‘job card’ ki hap ban pynïasoh beit ïa u Aadhaar bad ka jaka kynshew pisa bad ki dang bun bha ki nongtrei bylla kiba don ‘job card’ kiba khlem pat pynïasoh ïa u Aadhaar bad ka jaka kynshew pisa ha Bank.
Kumta u Mondal u la ong ba na ka liang jong u kum u Myntri u la thoh kawei ka shithi bad kumjuh ruh u Myntri Rangbah u la rah ïa kane ka mat ha Delhi.
Haba kylli sa katno lak ngut ki nongtrei bylla hapoh kane ka skhim kim pat don Aadhaar bad kim pat pynïasoh bad ka jaka kynshew pisa, u Mondal u la ong ba um don ka jingkheiñ kaba tikna hynrei ki dang don bun bha kiba khlem leh ïa kane.
U la ong ba namarba ka ilekshon Lok Sabha ka dang ïaid mynta, ka jingkhmih lynti ka long ba hadien ka ilekshon ka Sorkar Pdeng kan sa lah ban pyndep ïa ki kam kiba sahteng. Kum ban pynkynmaw, ki nongtrei bylla hapoh ka MGNREGS ha Jylla ki don kumba 12,31,603 ngut bad bun kim pat leh ïa ka jingpynïasoh ïa u Aadhaar bad ki jaka kynshew pisa na ka bynta ban phah ïa ka jingsiew lyngba ka ABPS.
