Shillong, Jymmang 13
U nongïalam ka Trinamool Youth Congress, u samla Fernandez Dkhar u la dawa phah ieh noh kam ïa u DGP ka Jylla, u Dr. Lajja Ram Bishnoi, u ban sa shongthait noh mynta u bnai halor ka jingkynnoh pyndonkam da u nombor ‘plate’ thok.
U la kynthoh ruh ba ka jingleh jong utei u heh pulit ka pyni shai ïa ka jingdkoh bad jingsynjor jong ki bor ka aiñ bad kane ka wanrah ïa ka jingduh jingshaniah ïa ka aiñ.
Utei u nongïalam jong ka Trinamol Youth Congress u la pynkynmaw ruh ïa kawei ka jingjia ba dang shu jia mynta shi bnai mynshuwa ha ka nongbah, ha kaba kawei ka kali ‘Creta’ ka la leit ban tynrah ïa kawei ka ar-shaka, bad hadien ka jingtohkit la lap pynban ba kata ka kali ba tynrah ka la pyndonkam da ka nombor jong kawei pat ka ar-shaka Yamaha.
U President jong ka TMC Youth Congress, u samla Fernandez Dkhar u la ong ruh, “Kam long shuh kaei-kaei kaba phylla ba kum kitei ki jingjia kin wan jia, namar mynta ka lah paw shai kdar ba kat u heh pulit uba dei u DGP u donkti ha ka ban pyndonkam bakla ïa u nombor ‘plate’.”
U la ong ruh ba ka aiñ ka la dkoh namar kat ka kyrdan jong u DGP um shym la bud ïa ki kyndon. Utei u samla u la kynnoh ruh ba dei na kane ka daw ba ki nongbat aiñ ki pynkheiñ ïa ka aiñ bad la sakhi ba ka la don ka jingïa khaïi be-aiñ ïa u kwai tyrkhong (Supari) napoh Bangladesh sha Assam lyngba ka Meghalaya bad kumjuh ïa u piat bad ka shini sha Bangladesh.
“Nalorkata, ngim dei ban klet ba ka jingshalan tuh ïa u dewïong ka la wanrah ïa ka jingduhnong kaba palat ïa ka Jylla bad ka la nang pynkyrduh bad wanrah jingeh khamtam ïa u rit u ria. Ngim lah ban klet ïa ka jingïoh rung u drok ym tang ha sor hynrei wat shaduh ki shnong nongkyndong kaban bampong ïa ka imlang sahlang bad wat ïa ka jaitbynriew ruh khamtam ïa ki khun samla,” u la ong.
Shuh shuh utei u nongïalam u la bynrap, “Kumba la pynbna ba ngin sa ïoh noh da i DGP bathymmai (Ngi ai kitbok kitrwiang bad ka met kaba koit ba khiah ïa i Kong Idashisha Nongrang). Hynrei ngin ïai ban ba u DGP u ban sa shongthait noh u dei ban ieh noh kam wat lada u don sah tang katto-katne sngi ha ka kam ruh bad khlem ka jingaibor na ki bor ba pynïaid, u DGP um dei ban mih na ka Jylla katba ka jingtohkit ka dang ïaid shakhmat.”
