Shillong, Jymmang:
Ka Jaiñtia Students’ Union (JSU) Sengkmie ka la kyntu ïa u Deputy Commissioner (DC) jong ka West Jaiñtia Hills ba un peit bniah bha ïa ki centre ban thoh ïa ka eksamin CUET khnang ban lait na ki kam leh thurmur.
Ha kaba ïadei bad kane, ka JSU ha ka Lah Sngi U Blei ka la ai da ka jingthoh sha u DC bad kyrpad ban peit bniah bha ïa ki Examination Center shwa ban pynlong ïa ka eksamin CUET khnang ban lait na ki jingleh thurmur ki nongpynïaid eksam kumba la long ha ka taïew ba la dep ha ka por ba thoh ïa ka eksamin NEET ha St. Mary Mazzarello Secondary School, Jowai.
Ha katei ka jingthoh, ka JSU ka la ai jingmut ïa ka bor district lyngba u DC ba dei ban leit peit ïa ki center thoh eksamin ban khmih hi da la jong ki khmat hato ka la biang ne em ka rukom pynkhreh ban thoh ki khynnah ïa ka eksam CUET kaban sa pynlong ha ka 15 tarik haduh 18 tarik mynta u bnai.
Ka JSU ka la pyntip ba halor kane, na ka liang ki bor pynïaid district ki la ong ba kin sa shim ïa kane ka jingai jingmut ka seng bad kin sa khot shwa da ka jingïalang bad ki nongpynïaid eksam shwa ban pynkhreh ban thoh ïa ka eksamin CUET ban lait na ka kynrum kynram khnang ban ym duhnong ki khynnah pule ki ban sa thoh eksam hapoh ka district da ki hajar ngut.
Ka JSU ka la shim khia ban leh ïa kaba dei eh khnang ba ki khynnah pule na ri lum Jaiñtia kin sngew shngaiñ ban thoh ïa ka eksam ha la ki center ba la pynkhreh ïa ki bad ban lait na ka jingleh thurmur ki nongpynïaid eksam bad kan ïaid beit ïaid ryntih.
