Shillong, Jymmang 14
Ka Joint Action Committee Namchiang Narpuh (Tongseng-Ratacherra), East Jaiñtia Hills, ka pynpaw ïa ka jingsngewkhia kaba jur halor ka jingkuman ka Sorkar lyngba ka NHAI ban maramot ïa ka surok NH-6 bad byrngem ban mih paidbah biang sa shisien lada ka Sorkar kam lah ban maramot ïa kane ka surok hapoh shi taïew.
“Ka jingbym leh eiei ka Sorkar ban pynbha ïa ka surok ha kata ka rukom, ka la pynjynjar ïa ki nongleit-nongwan namar ka jingsniew palat ka surok shaba palat pud,” la ong u Chairman ka JAC Namchiang (Narpuh), East Jaiñtia Hills District, Bah Lasting Pala ha ka kyrwoh khubor.
Ha kajuh ka por, u la ong ba ka long kaba thamula ba ka Sorkar/NHAI ka siang rong ha ki bynta jong ka surok ba dang bha bad ieh pat ïa ki krem ki kroh ha shi lynter ka surok.
“Ka jingleh kane ka kompeni ka long tang ban ïoh pyllait ‘Bill’ bad ka long kumba tap eit miaw,” u la ong.
U Bah Pala u la ong ruh ba bunsien ki nongleit-nongwan khamtam kiba pang ba shitom ki sahkut/dheng kali ha ka thaiñ Tongseng shaduh Umkiang, Ratacherra khamtam ha ki bynta ka Mandir da ki bun kynta namar ka jingbym lah ïaid shuh ki kali kum ka kali kit mawshun, kit dewïong kiba kit palat pud, ha kawei ka liang kiba long shi bynta jong ka jingsahkut kali ha shi lynter ka surok NH-6.
“Ka JAC ka kyntu ïa ka Sorkar/NHAI ban maramot noh ïa ka surok NH-6 hapoh shi taïew. Lada kam lah, ka JAC kan lum paidbah biang ha surok ban pakhang syndon ïa ka surok,” la ong utei u nongïalam.
Shuh shuh ka JAC ka maham ïa ki trok dewïong/mawshun ba kim dei ban pynkheiñ ïa ka hukum jong ka ‘Supreme Court’ da kaba kit palat pud nangne shakhmat.
“Lada ka JAC ka dang lap ïa kiba kit palat pud kan shim ïa ka sienjam da kaba mih paidbah ban kem naphang ïa ki trok dewïong/mawshun kiba pynkheiñ aiñ bad aiti syndon ïa ki sha ka bor jong ka aiñ bad ban ai ruh da ka ejahar,” la ong u Chairman ka JAC.
