Shillong, Jymmang:
Ka Srinagar Parliamentary Constituency ha Jammu & Kashmir ha ka Lah Sngi U Blei ka la sakhi ïa ka jingmih bun ki nongthep ‘vote’ ban jied ïa u MP bathymmai, bad kane ka long ka sien banyngkong hadien 26 snem ba ki paidbah ki la ïa tuid sha ki jaka thep ‘vote’.
Katkum ki jingkheiñ jingdiah na ka Election Commission jong ka Ri India (ECI), ki nongthep ‘vote’ ha Srinagar Parliamentary Constituency kiba la pyndep ïa la ka kamram ki long 37.98%. Hynrei, kane ka jingkheiñ kam pat dei kaba khatduh namar bym pat ïoh lut ïa ki jingtip ba thikna na baroh ki Polling Station. Kane ka konstitwensi ka don kumba 17.47 lak ngut ki nongthep ‘vote’.
Ha ki ilekshon MP ba la dep, ka jingmih ki nongthep ‘vote’ ha Srinagar Parliamentary Constituency ka la long tang 14.43% ha u snem 2019, 25.86% ha u snem 2014, 25.55% ha u snem 2009, 18.57% ha u snem 2004, 11.93% ha u snem 1999, 30.06% ha u snem 1998 bad 40.04% ha u snem 1996.
Ha u kyrwoh khubor na ka ECI, la ong ba ki paidbah kiba la mih ban thep ‘vote’ ha ki jaka kiba don ha Chadoora, Chah-i-sharief, Ganderbal, Kangan, Khansahib bad Shopian ka la kot sha palat 45% ha kane ka kynti.
Ha kajuh ka por, la ong ba ka jingthep ‘vote’ ka la long kaba ïaid beit ha baroh kawei ka konstitwensi bad khamtam ha ki jaka kiba ju don jingma kum ka Budgam, Ganderbal, Pulwama, bad Shopian.
Ka jingthep ‘vote’ ka la long ha ki 2,135 tylli ki ‘Polling Station’, bad ki la don ruh palat 8,000 ngut kiba la ïashim bynta ban pynïaid ïa ka ilekshon. Kane ka la long ka sien banyngkong ba la pynlong ïa ka ilekshon hadien ba la weng noh ïa ka Article 370 bad ba ïa ka jylla Jammu & Kashmir la pynhiar kyrdan sha ka Union Territory.
Ha kane ka sien, ki don haduh 24 ngut ki kyrtong kiba ïa aireng haba ïanujor bad ki 12 ngut ha u snem 2019.
Nalorkata, ka ECI, ha kane ka kynti, ka la ailad ïa ki nong Kashmir kiba sah ha ki jaka ba shipor ha Delhi, Jammu bad Udhampur ban jied ïa ki MP da kaba leit dalade sha ki jaka thep ‘vote’ ba la buh kyrpang lane ban pyndonkam da ka ‘Postal Ballot’. Na ka liang ka ECI ka la buh ïa 21 tylli ki ‘Polling Station’ ha Jammu, kawei ha Udhampur bad saw tylli ha Delhi.
