Nongstoiñ, Jymmang:
Ka Seng Khasi West Khasi Hills District ha ka 13 tarik u Jymmang ka la ïoh ban pynkut noh ïa ka ‘Shad Suk Mynsiem’ kaba 23 da ka jingiphuh jingiphieng bad shongkun bha ha madan New Nongstoiñ.
Katei ka lympung ba shisien shisnem jong ka Seng Khasi West Khasi Hills ka la sdang naduh ka Sngi U Blei ha madan New Nongstoiñ, ha kaba ki tymmen ki san jong ka Seng Khasi Seng Kmie Mawkhar Shillong, ki la pyndep ïa ka ai-nguh ai-dem shwa ba ki nongshad kin noh kjat ha ka lympung ha ka Sngi Nyngkong bad ka ai-nguh ai-dem ka long ba U Blei nongbuh nongpynlong un ri un sumar bad un don ryngkat ha kane ka lympung bad ba kito baroh kiba la wan ban shimbynta ha ka jingshad, kin poi suk bad leit phai suk sha ki jaka ba ki wan.
Ha katei ka sngi la ïohi ïa ka jingïashim bynta shitrhem ruh da ki ‘rang bad ki ‘thei ha ka lympung shad, bad kumba 131 ngut ki shynrang bad 118 ngut ki kynthei na kylleng ki jaka, ki la poi lang ban pyni ïa ka jingshad tynrai ha la ka riam tynrai kaba dei ruh ka dustur jong ki Khasi kaba itynnad, kaba long ruh ka dak jong ka jingsngewnguh ïa u Blei trai kynrad nongbuh nongthaw bad u nongpynlong bad ym tang katta ha kane ka lympung shad kaba itynnad la wan ban sakhi lang ruh da kiba bun ki paidbah na kylleng ki jaka.
Lah ban kdew hangne, kum ka dak ban burom ïa kane ‘Shad Suk Mynsiem’ jong ka Seng Khasi West Khasi Hills District, u Bah Garod LSN Dykes, Deputy Commissioner ka West Khasi Hills District u la pynbna shuti lang ïa baroh ki tnat treikam sorkar bapher-bapher kumjuh ruh bad ki skul jong ka thaiñ.
Ha katei ka sngi la wan ban sakhi lang da u Bah Phriar Ryntathiang, President Seng Khasi West Khasi Hills, bad kiwei kiwei ki ‘riew rangbah jong ka thaiñ, bad ha kane ka sngi pynkut ïa ka jinglehniam, u Bah Dwik Marshillong President Seng Khasi Laitarted Eastern West Khasi Hills District u la wan ban pynhiar ïa ka lama ka seng bad la synran lang ïa utei u rangbah da u President Seng Khasi West Khasi Hills District bad kiwei kiwei.
