![Ka don ka jingbym ïasngewthuh jingmut hapdeng ki seng kiba ïatehlok ha ka ‘INDIA’: Conrad india-bloc](https://unongsainhima.com/wp-content/uploads/2024/05/india-bloc.jpg)
Shillong, Jymmang 14
U Myntri Rangbah ka Jylla, u Conrad K. Sangma u la ong ba ka don ka jingbym ïasngewthuh jingmut hapdeng ki seng kiba ïatehlok hapoh ka INDIA Bloc bad kumta, ka long kaba eh ïa kano-kano ka kynhun synrop ban neh.
“Kano-kano ka kynhun ïateh lok ka lah ban mih hynrei phi dei ban sngewthuh ba ha man la ka kynhun synrop ne ha kano-kano ka jingïatehlok kaba phi don, phi donkam ban trei ha ryngkat ka jingsngewthuh jingmut,” la ong u Sangma hadien ba la wan synran lang ïa u Myntri Rangbahduh ka ri, u Narendra Modi uba la leit ban thep kyrteng kum u kyrtong na Varanasi konstitwensi ha ka sien kaba lai ha ka Sngi Ba-ar.
U la ong ruh, “Ngim ong ba baroh ki biang lut ha ka NDA, hynrei ngi pyntikna barabor ba lyngba ki jingïakren bad jingïamir jingmut, kino-kino ki jingsngewkhia kiba mih, ngi pynbeit ïa ki bad wad ka lad ka lynti ban trei halor jong ki.”
Haba phai pat sha ka INDIA Bloc, u Sangma u la ong ba kam don kano-kano ka jingïaid shakhmat ban poi sha ka rai bad ka don ruh ka jingbym ïasngewthuh jingmut kaba jur hapdeng ki seng kiba ïatehlok bad kumta namar kine ki jinglong-jingman, ka long kaba eh ïa ki kynhun synrop ban neh.
“Hooid ngi ïashrut hapoh ka NDA hynrei ngi poi sha ka jingsngewthuh jingmut, bad ngi ngeit ha ka ban pynbeit ïa ki jingeh jong ngi da kaba ïakren para ma ngi bad ban wad ka lad ka lynti ban poi sha ka jingïabeit,” u la ong.
Ha kawei ka liang, u Myntri Rangbah haba kren halor ka jingwan thep kyrteng u Modi, u la ong ba ka seng ka long shi bynta jong ka NDA bad kum ki seng kiba ïatehlok hapoh ka NDA, ki la shah khot sngewbha ban ïadon bynta lang ha ka jingthep kyrteng bad ki dap da ka jingsngewkmen.
Shuh shuh u Sangma u la bynrap, “Ka long kaba itynnad ruh ban ïohi ïa ka jingkylla dur jong ka Banaras ha kine ki san snem ba la dep; kiba bun ki kam pynroi bad nga tikna ba sa shisien ki nongshong shnong ka Banaras bad ka ri baroh kawei kin ai ka jingshaniah bad jingngeit ha ka NDA hapoh ka jingïalam u Myntri Rangbahduh ka ri.”