Shillong, Jymmang 14
Kawei ka kompani kaba ju shna ïa ka surok ha ki thaiñ Pynursla kaba dei shi bynta jong ka surok Shillong-Dawki, ka la shah kynnoh ba ka khlem siew pisa kumba T. 3 klur tam sha ka kompani kaba la pynbiang ïa u maw.
Katkum ka jingtip ba la ai da ki pulit ha ka Sngi Ba-Ar, la ong ba u Nitesh Kumar, uba dei u trai jong ka M/s Kaveri Infratech India, u la ujor ba hapdeng ka 25 tarik Naitung, 2021 haduh Nohprah 2021, u la pynbiang 69,500 Metric Ton u maw ba shongdor kumba T. 3.13 klur sha ki saw ngut ki briew.
Kitei ki saw ngut, katkum ka jingujor, ki dei kiba la tip kyrteng kum u Vinod Kumar, uba dei u trai jong ka Vinod Granite, Mirzapur, Lucknow (Uttar Pradesh), u Surendra Pal Singh, Director ka SS Infrazone, Lucknow, (3) IP Singh, Director ka SS Infrazone, Lucknow, bad u Abhishek Singh, Manager, SS Infrazone, Lucknow.
Hynrei, u Kumar u la kynnoh ba kitei saw ngut ki briew ki la iehnoh ïa ka jaka trei kaba don ha Pynursla khlem da siew ïa katei ka pisa kaba ` 3.13 klur sha u.
Lah ban kdew ba ka SS Infrazone ka dei kawei na ki kompani kaba la shah jied ban pyntrei ïa ka surok Shillong-Dawki. Katkum ka jingtip ba la ïohlum na ka National Highways and Infrastructure Development Corporation Limited (NHIDCL), katei ka kompani ka la ïoh ban pyntrei ïa ka bynta banyngkong bad basaw jong ka surok Shillong-Dawki kaba don ha ka jingjngai 11.60 km bad 17.77 km. Ïa ka kam la aiti sha kane ka kompani ha u snem 2020 ba kan pyntrei.
Hynrei, kane ka kompani ka la iehnoh ïa ka jingtrei bad katkum ka jingtip ba la pynbiang da ka NHIDCL haduh ka 29 tarik Rymphang, 2024, la pyni ba ka kyrteng jong katei ka kompani SS Infrazone kam don shuh bad la don da kiwei pat bathymmai.
