Shillong, Jymmang 14
U Myntri ka tnat Social Welfare, Bah Paul Lyngdoh, u la ong ba ka jingïaleh jong ka Sorkar ryngkat bad kiwei ki bor ban ïakhun pyrshah ïa ka jingwan poi u drok ka la long kaba khlaiñ ha kaba la lah ban kem bad kurup drok jan man ka por.
“Wat la ka jingïaleh ban tehlakam ïa ka jingïoh rung u drok bad kiwei ki jingdih pynbuaid hapoh ka jylla ka la ïaid bha hynrei ngi donkam pat ban pynkhlaiñ ïa ki jaka rung (Entry Point) sha ka Jylla,” la ong u Bah Paul haba kren sha ki lad pathai khubor.
U Myntri u la pyntip ba ka jingïakhun pyrshah ïa u drok ka la long kaba tyngeh khamtam na ka liang ka tnat pulit kiba la trei shitom bad mynta na ka liang jong ki pulit ki la dep ban phah ïa ka thup kyrteng jong kito ki nongkhaïi drok kiba la shah kem bunsien sha ka Advisory Board ban shim rai halor ki lad pynsaja.
U la pyntip ruh ba ka Advisory Board kan sa shong jingïalang shen hadien ba la kut ka jingtreikam ka Model Code of Conduct (MCC), khnang ba kan shim pat ïa ka rai halor ki jingpynsaja ban ai sha ki katkum ka PITNPDS Act, 1988.
U Bah Paul u la ong, “Ïa ka thup la dep ban mynjur bad la phah sha ka Advisory Board bad hadien phin sa ïohi ïa ki briew ki ban shah pynngat ha ki jingpynsaja namar ka jingkhaïi ïa ki jingdih buaid bad kane hi kan long ka jingai mynsiem ïa ka jingpyrshang jong ki ban tehlakam ïa kane ka jingsniew.”
Ha kawei pat ka liang, u Myntri u la ïathuh ba u la dep ban kren ïa u Symbud Myntri Rangbah ka jylla ba khmih ïa ka tnat Kam Pohïing u Bah Prestone Tynsong halor ka jingdonkam ban pynkhlaiñ ïa ka jingtreikam ki pulit ha ki Entry Point.
U Bah Paul u la ong ba katkum ka jinglap, haduh kumba 70 persen ki jingdih buaid kiba wan sha Meghalaya, ki rung lyngba ka East Jaiñtia Hills District bad kumta donkam ban pynkhlaiñ ïa ka jingtreikam ki pulit ha kane ka district.
U la pyntip pat ba kane ka kam kan sa urlong tad ynda la lah ban thungkam ïa ki 3000 tam ha ka tnat pulit bad haduh kumba 500 ngut ki volunteer ka Home Guard, ha kaba hadien kane yn sa lah ban pynkhlaiñ ban peitngor ha kine ki jaka rung shapoh ka Jylla.
