Nongpoh, Jymmang 14
Ki bahaïing hasem jong u Bah Kyrmen Lyngdoh Nonglait (38 snem), u rangbah uba la shah pynïap ha ka shnong Erpakon ha ka janmiet jong ka 11 tarik u Jymmang, ha ka Sngi Ba-ar hapdeng ka jingsngewsih kthang ki la pyndep noh ïa ka jinglehniam khatduh bad leit ontep ïa ka met jong utei u rangbah ha ka shnong Erpakon.
Ha kane ka sngi ban lehniam khatduh ïa utei u rangbah, la wan ban ïadon ryngkat naduh ki khun samla jong ka shnong, ki longkmie-longkpa bad ki nongshong shnong na ki shnong ba marjan kiba la rah ruh da ki lama ïong ha ryngkat ki jingthoh pynrem ïa u bar jylla uba la donkti ban pynïap dusmon ïa u Bah Kyrmen Lyngdoh Nonglait ban dawa ba ki bor jong ka aiñ ki dei ban pynshitom tyngeh ïa kitei ki briew kiba donkti ha kum kine ki jait kam pyntriem khnang ba kin nym jia shuh hadien habud.
Kum ban shu kdew hangne, u Bah Kyrmen Lyngdoh Nonglait la suba ba u la shah bom da ka lyntang ha ka por 8 baje janmiet jong ka 11 tarik u Jymmang, 2024 ha uwei u bar jylla uba trei bylla ha kawei ka dukan bam kaba don ha ka shnong Erpakon ïa uba la tip kyrteng kum u Raju Rajbhar. Utei u bar jylla u la shah kem noh ha ki pulit ka Ri Bhoi hadien shisngi jong katei ka jingjia.
Na ka liang ki bahaïing hasem jong utei u rangbah da ka mynsiem jong ka jingsngewsih kthang bad ïam paitdohnud ki la buh ka jingkyntu ïa ki bor jong ka aiñ ba ki dei ban shim khia ban ai ïa ka jingpynsaja kaba tyngeh pyrshah ïa utei u bar jylla uba la nud ban shim wat ïa ka jingim briew.
