Shillong, Jymmang:
Ki khynnah pule ka Women’s College, Shillong jong ka tnat pule Social Work ha ka 11 tarik u Jymmang ki la ïoh ban pynkut noh ïa ka jingleit ‘Fieldwork’ hapoh ka shnong Mawlong, New Shillong kaba ki la sdang naduh mynshem snem (2023) bad pynkut noh mynta u snem (2024).
Na ka liang ki khynnah pule shwa ba kin mih noh na kane ka shnong ki la kwah ban leh kaei-kaei katba lah khnang ba kan long ka jingmyntoi na bynta jong ki bad kumjuh ïa ki nongshong shnong ka thaiñ.
Ha kane ka sngi ki la ïoh ban pynlong da ki jingïalehkai kilan met, ka Cultural and Awareness prokram bad ka jingïakob shad bad rwai.
Haba phai sha ka jingïalehkai kilan met ki la ïoh ban pynlong da ka jingïakhun Inter-dong Football kum shibynta ban pynkynmaw ïa ka kolshor ki Khasi ha ryngkat ki katto-katne tylli ki jingshad tynrai.
Ki khynnah pule ki la pynlong ruh ïa ka prokram pynsngewthuh paidbah ha kaba ïadei bad ka kolshor bad ka ‘cyber crime’.
Kane ka jingpynlong ïa kane ka prokram ka long ruh kum shibynta ban pynshlur bad ban ai mynsiem ïa ki khynnah samla bad kumjuh ruh ïa ki nongshong shnong ka thaiñ baroh kawei.
Ha kane ka sngi la ïadonlang da ka Kong Rida Tynsong kaba dei ka Additional Programme Officer Mawpat Block kum ka Kongsan, u President ka FKJGP sengkmie, u Bah Dundee Cliff Khongsit kum u Symbud Kongsan, u Bah Kitkupar Nongphlang, National Youth Awadi, u Resource Person halor ka phang ‘Cyber Crime’, u Bah Challam, SI Mawdiangdiang Police Station, Resource Person ka Kong Bidalin Lyngdoh kaba dei ka dkhot jong ka Seng Khasi Mawlong, u Rangbah shnong Mawlong, ki nongkitkam shnong bad kiwei-kiwei.
